Kreu i partisë demokratike Lulzim Basha pak minuta më parë ka mbajtur një deklaratë për shtyp nga selia e PD-së.
Në deklaratën e tij Basha ka folur për grabitjen e djeshme në Rinas si dhe për banorët e bregut të lumit, duke u shprehur për një munges të rendit dhe sigurisë në vend dhe duke i cilësuar aktet e policisë të jo legjitime. Në fjalën e tij Basha është shprehur se:
“Dy ngjarje në një hark kohor prej më pak se 12 orësh ditën e djeshme janë dëshmi se shteti ka rënë. Se sot Shqipëria nuk ka rend publik dhe siguri. Se policia është kthyer në një bandë që për të pushtetin ilegjitim të marrë me krimin i ka lënë dorë të lirë krimit dhe po dhunon në mënyrë shtazarake qytetarët.
Dje në orën 5 e 30 të mëngjesit policia hyri nëpër banesa dhe hodhi gaz lotsjëllës brenda shtëpive ku ishin të pranishëm edhe të mitur nga mosha 3 vjeç e sipër.
Nga përplasja mes banorëve në mbrojtje të shtëpive të tyre 3 qytetarë përfunduan në spital ndërmjet të cilëve një 76 vjeçar me çarje në kokë që u operua, një grua me thyerje këmbë dhe një tjetër grua me fraktura.
10 qytetarë u shoqëruan në polici të gjitha gra dhe 4 prej të cilave minorene dhe një fëmijë 5 vjeç. Që nga protesta e 16 shkurtit janë shoqëruar 114 protestues dhe janë arrestuar 52 të tjerë.
Policia po përdoret për vetëm një qëllim: luftën ndaj popullit, luftën kundër njerëzve të pafajshëm që mbrojnë shtëpitë e tyre.Në këto dy muaj është përdorur gaz helmues me shumë se ne të gjithë historine e Shqipërisë.
Ndërkohë nuk ka asnjë përpjekje për të luftuar krimin. Vrasjet, tritoli dhe grabitjet me armë në mes të ditës po trondisin çdo ditë sigurinë e njerëzve në mes të qyteteve. I vetmi aktivitet kundër krimit është: policia shkoi në vendin e ngjarjes.
Arsyeja dhe shkaku kryesor i rënies së shtetit, i mungesës së sigurisë për jetën dhe pronën e qytetarëve është pakti mes krimit dhe qeverisë ilegjitime të ardhur në pushtet me ndihmën krimin.
Dhënia fund e këtij regjimi është sot emergjencë kombëtare. Prandaj protestojmë të shtunën me 13 prill në Tiranë.
Rruga e vetme për këtë është bashkimi i të gjithë shqiptarëve në betejën kundër padrejtësisë, krimit dhe korrupsionit, për sigurinë, jetën dhe mirëqenien e çdo shqiptari.”
(B.L/FAXWEB.AL)
