Zgjedhjet lokale/ “Princi i kurorës, përfaqësues i sektit të Rilindjes”, Kokëdhima sfidon hapur Veliajn

Kreu i Partisë Zgjidhja, Koço Kokëdhima ka shpallur zyrtarisht kantidaturën për kryetar të Bashkisë së Tiranës.

I ftuar në “Të Paekspozuarit”  me Ylli Rakipin, Kokëdhima është shprehur se e sfidon hapur Erion Veliaj në zgjedhjet për kryetar bashkie, pasi sipas tij, “Veliaj është një përfaqësues i sektit të Rilindjes, i cili njësoj si Rama është  person i kulturës korrupsionit, dhe merret thjesht me korruptim”.

Ndër të tjera Kokëdhima shprehet se:  “Kam vendosur që t’i kërkoj mbështetje Kongresit të partisë ZGJIDHJE që t’i shpall garë Erion Veliajt për drejtimin e Bashkisë së Tiranës. Është shumë e rëndësishme, për ta bërë bashkinë të hapur për qytetarët, pushtet të qytetarëve, pushtet njerëzor dhe efektiv. Së dyti mendoj se është shume e rëndësishme që të ndërpresim vazhdimësinë e Erion Velisë, sepse Veliaj është një person shumë tipik përfaqësues sektit të Rilindjes, ka të njëjtën filozofi të njëjtë si Rilindja, njësoj si Rama, person i kulturës korrupsionit, merret thjesht me korruptimin”.

Sipas Kokëdhimës, “princi i kurorës “, sikurse e quan ai, nuk mund të marrë një mandate të dytë.

“E kam shpjeguar që projekti ynë është projekt lirie. Ne luftojmë për të shembur kastën, të rikthejmë republikën, të zhbëhet kapja e shtetit. Do godas dhe ndërpres mandatin e dytë se është princi i kurorës së Rilindjes. Kishte dy princa po Sajmirin e morën në qafë këta. Sigurisht që do bëjmë atë gjë që është e domosdoshme për popullin tonë, për vendin tonë”,- thotë Kokëdhima.