Ambasada shqiptare në SHBA, përmes një postimi në rrjetin social Facebook ka shprehur pakënaqësinë dhe rezervat e saj ndaj lobimit grek kundër shqiptarëve të bërë në ShBA.
Në postimin e saj, ambasada shqiptare shprehu keqardhje që “mitingu përkujtimor i Pavarësisë greke, i mbajtur në 7 prill, është keqpërdorur nga grupe nacionaliste për të shpalosur programet e tyre shoviniste me pretendime territoriale për jugun e Shqipërisë”.
Ajo e cilëson një ngjarje të tillë të papranueshme, duke u shprehur se: “organizatorët të cilët e lejojnë shfaqen e këtyre qëndrimeve shoviniste, minojnë në këtë mënyrë miqësinë midis dy popujve.”
Postimi i plotë:
Shprehim keqardhjen që mitingu në Boston dhe Filadelfia të SHBA-së më 7 prill 2019 në përkujtim të përvjetorit të Pavarësisë së Greqisë (25 mars 1821) është keqpërdorur nga grupe nacionaliste për të shpalosur programet e tyre shoviniste me pretendime territoriale për jugun e Shqipërisë.
Është e papranueshme që në këtë miting që përkujton një nga ngjarjet më të shënuara në historinë e popullit grek, për të cilën dhe arvanitasit dhanë një kontribut të jashtëzakonshëm, organizatorët e këtij manifestimi lejojnë shfaqjen e qëndrimeve shoviniste që minojnë miqësinë midis dy popujve.
Zyra e shtypit të Ambasadës
Discussion about this post