Fadromat e IKMT-së kanë shkuar sërish mëngjesin e sotëm tek Bregu i Lumit për të prishur shtëpitë e banorëve, të cilat preken nga ndërtimi i Bulevardit të Ri të kryeqytetit.
Nga njoftimet e banorëve për Fax News, mësohet se ka patur përplasje mes tyre dhe policisë, por disa telefonë me të cilët është xhiruar ngjarja, janë sekuestruar.
Ndërkohë që në videon e mëposhtme shihet qartë dhuna e një prej punonjësve të policisë në drejtim të gazetares.
Banorët thonë se forcat policore janë më të shumta se herën e kaluar, kur policia përdori gaz lotsjellës për të nxjerrë nga shtepite banorët që kundërshtojne prishjen e shtëpive pa dëmshpërblim.
Kujtojmë se javën e kaluar në zonën e Bregut të Lumit u shembën 7 banesa, nga 38 që janë parashikuar të prishen gjithsej.
31 banesat e mbetura, që pritet të shemben kanë qenë në proces legalizimi, dhe nuk janë shpronësuar nga ana e Bashkisë, duke i diferencuar nga banesat e prishura më herët.
Ashtu si dhe herën e shkuar mediat dhe ish-deputetët e PD-së nuk janë lejuar që të qëndrojnë pranë banorëve, dhe mbahen larg nga kordoni i policisë.
Ish-deputeti Klevis Balliu në një prononcim për Fax News u shpreh se këta banorë nuk po shpronësohen për shkak se janë nga Veriu, dhe Rama sipas tij njihet për qëndrimet e tij raciste.
(E.K/FAXWEB.AL)
