Prokurorja Dhorina Theodhori para KPK-së, asnjë problem me pasurinë

Drejtuesja e Prokurorisë së Korçës, Dhorina Theodhori,  ka dalë ditën e sotme para Komisionit të Pavarur të Kualifikimit lidhur kjo me procesin e vettingut dhe rishikimit të 3 kritereve të rivlerësimit, pasurinë, aftësitë profesionale dhe pastërtinë e figurës.

Hetimi është kryer në të tre kriteret e rivlerësimit, pasurinë, aftësitë profesionale dhe pastërtinë e figurës.

Subjekti ka qenë bashkëpunuese duke dorëzuar dokumentacionin në kohë.

Në lidhje me pasurinë, ILDKPKI, ka dorëzuar një raport me konstatimin se, deklarimi është i saktë dhe në përputhje me ligjin. Ka burime të ligjshme, nuk ka kryer fshehje të pasurisë si dhe nuk ka kryer deklarim të rremë.

KPK, ka kryer një hetim të thelluar në lidhje me pasuritë: në deklaratën Veting ka deklaruar truall 56 metra katrorë. Pjesë takuese 1/3, në bashkëpronësi me nënën dhe motrën.

Kjo pasuri është krijuar nga babai në vitin 1998. Nga informacion i administruar nga Bashkia, rezulton se kjo pronë i është nënshtruar rikonstruksionit nga Bashkia, në kuadër të rregullimit të pazarit të vjetër. Nuk ka dyshime për këtë pasuri.

Gjithashtu drejtuesja e Prokurorisë Korçë, Thedhori ka një apartament 67 metra katrorë në bashkëpronësi me nënën dhe motrën, me burim nga trashëgimia nga babai.

“Nuk ka dyshime në lidhje me këtë pasuri. Është deklaruar edhe një shtesë, me burim kursimet nga babai i saj, kjo shtesë nuk është deklaruar për dy vite në deklarata.

Subjekti ka në bashkëpronësi pyll 242 hektarë dhe kullotë. Kjo pronë është e përfituar nga kompesimi i pronave. Nuk ka dyshime për këtë pasuri”, u relatua në këtë përballje të parë të Theodhorit në KPK.

Në lidhje me figurën, DSIK, ka dorëzuar një raport me konstatimin se subjekti ka plotësuar saktë dhe me vërtetësi formularin.

Konstatohet përshtatshmëri për subjektin e rivlerësimit për vazhdimin në detyrë.

Në lidhje me aftësitë profesionale, Prokuroria e Përgjithshme ka kryer një vlerësim duke shqyrtuar dokumente, ku ka konstatuar se ka aftësi në arsyetimin ligjor dhe kryer veprime procedurale hetimore produktive. Ka pasur 6 denoncime, 1 prej të cilëve në ONM.

(s.a/faxweb.al)