Trofeu në duart e Rennes, kupa e Francës ikën nga Parisi

Kupa e Francës ikën nga Parisi.

Pasi është fituar për katër vite radhazi nga PSG, trofeu ka kaluar në duart e Rennes, që ka përmbysur parashikimet dhe lojtarët e Tuchel në finalen e luajtur në “Saint Deni”.

Dhe të mendosh se kampionët në fuqi të Francës kanë qenë në avantazh 2-0 pas 21 minutave falë dy golave të mrekullueshëm të realizuar nga Dani Alves dhe Neymar, i kthyer titullar pas rreth tre muajsh.

Gjithsesi, Rennes nuk është dorëzuar dhe, pasi ka ngushtuar shifrat në 2-1 pesë minuta para mbylljes së pjesës së parë falë një autogoli të Kimpembe, ka shënuar edhe golin e barazimit 2-2 në minutën e 66-të me Mexer.

Një rezultat që ka mbetur i pandryshuar brenda kohës së rregullt, duke e çuar finalen e kupës në kohën shtesë, e cila është mbyllur po 2-2 dhe në mënyrën më të keqe për parisienët, që kanë humbur Mbappe, i ndëshkuar me një karton të kuq për shkak të një ndërhyrje të rrezikshme.

Lotaria e penaltive i ka buzëqeshur Rennes, që ka fituar 6-5 pas gabimit të Nkunku.