Sulmuesi 23-vjeçar francez Anthony Martial mund të transferohet te Juventusi në merkaton e verës. Për drejtorin sportiv Fabio Paratici, sulmuesi që aktualisht luan me Manchester United është përforcimi ideal për bardhezinjtë, ndaj është gati të bëjë çmendurinë për ta sjellë atë në Serinë A.
Pas dështimit të United për të shkuar në Champions League sezonin tjetër Martial duket se është i tepërt në “Old Trafford”, ndaj mund të largohet në merkaton e verës. Lojtari firmosi në janar kontratën e re me Manchester United, deri në vitin 2024, por dje dolën zërat e parë se trajneri Solskjaer është penduar për këtë gjë. Ndaj “djajtë” kanë vendosur ta nxjerrin në shitje talentin francez, që kushton 60 milionë euro.
Ndërkohë që te Juventusi kanë nevojë për “gjak të ri”. Duke parë se Cristiano Ronaldo dhe Mario Mandzukic kanë nevojë për më shumë mbështetje dhe pushim, te Juventusi po synojnë një lojtar të ri. Gjithsesi, Martial nuk është kandidati i vetëm, pasi edhe Mauro Icardi mund të transferohet te Juventusi pas një shkëmbimi “kokë më kokë” me Paolo Dybala, që do të kalonte tek Interi.
Discussion about this post