Ish-ministri i Jashtëm Kastriot Islami ka qenë i ftuar në studion e lajmeve të Fax News ku ka komentuar samitin e fundit të Brdo-Brujnit që u mbajt në vendin tonë, nën udhëheqjen e presidentit Meta.
Islami ka folur për pakënaqësitë që u vërejtën në këtë samit kur presidenti serb Vuçiç nuk pranoi që të bënte foto me presidentin Meta, apo fakti që Hashim Thaçi refuzoi drekën e shtruar pas samitit.
“Takimi i Tiranës, dhe qëllimi i gjithë kësaj nisme është të nxisë bashkëpunimin e vendeve të rajonit. Kjo është dhe një kusht i BE-së, që vendet të fillojnë dhe të komunikojnë mes tyre, në mënyrë që të testohen bashkëpunimet mes shteteve. Samiti i Berlinit është një gjë tjetër, dhe Merkel dhe Macron kërkuan që ti jepnin një mesazh qytetarëve të Ballkanit, ku iu thanë drejtuesve të tyre të gjitha problemet që ata kanë”, u shpreh Islami.
Lidhur me dështimin e planit për marrëveshjen e ndryshimit të kufijve, Islami u shpreh se në lojë kanë qenë dhe personazhe të tjerë si Mogherini.
”Vuçiç nxori zbuluar Ramën dhe Thaçin, kur iu tha qytetarëve të tij se kishte dështuar plani për ndryshimin e kufijve. Mogherini ka qenë pjesë e lojës, dhe këtë e pamë dhe në samitin që u mbajt në Tiranë”, deklaroi ish-ministri.
Ish-ministri foli dhe për qasjet e fundit nacionaliste të Thaçit dhe Ramës, të cilët kanë nisur sulmet ndaj BE-së, duke thënë se kjo është një çmenduri, dhe nuk është e vërtetë që SHBA-të janë krah tyre.
“Ti thuash Merkelit dhe Macronit që nëse ju nuk na hapni derën ne shkojmë i biemë nga Amerika, është çmenduri. Kjo për shkak se sa të paguajnë këta lobistë, Merkel dhe Macron e marrin telefonin dhe flasin me Trampin”, u shpreh Islami.
Ndërkohë që lidhur me vizitën e Dodik në Tiranë, Islami tha se kjo ishte një vizitë formale, dhe nuk ka qenë presidenti Meta që e ka ftuar. Sipas Islamit, kryeministri Edi Rama përmes mediave të tij ka tentuar që të luajë me nacionalizmat, dhe se Dodik e kishte sjellë Meta në Tiranë.
(E.K/FAXWEB.AL)
Discussion about this post