Opozita e bashkuar do të mbaj mbrëmjen e sotme protestën e katërt të paralajmëruar në rang kombëtar, duke insistuar në kërkesën e tyre për largim të kryeministrit Edi Rama, dhe krijimin e qeverisë tranzitore që do të cojë vendin në zgjedhje të lira.
Protesta pritet të fillojë rreth orës 18:30 përpara kryeministrisë, ndërsa burime bëjnë me dije se opozitarët kanë kërkuar leje deri në mesnatë, ndërsa policia e Tiranës i ka lejuar të protestojnë për rreth dy orë deri në 20:30.
Ende nuk dihet se si do të vijoi protesta e sotme, apo cilat janë pritshmëritë, ndërkohë që bëhet me dije se një numër i madhë efektivësh pritet të jenë të angazhuar gjatë protestës së sotme.
Po ashtu, përveç forcave të policisë godina e Parlamentit, nga ana tjetër është e rrethuar me gardh metalik dhe tela me gjëmba, një masë kjo e shtuar e policisë si masë për të shuar çdo skenar të mundshëm që mund të kenë protestuesit, ndërsa efektivët e policisë do të jenë të pajisur me maska kundragaz.
Masat e sigurisë gjatë protestës së sotme janë tepër të larta, ku veç numrit të shtuar të policisë, kemi një rritje të sigurisë edhe përmes instalimit të kamerave në Bulevardin ‘Dëshmorët e Kombit” me rezolucion të lartë për të filmuar çdo lëvizje, ndërsa turmat pritet që të monitorohen nga godinat e larta,nga forcat RENEA dhe efektivët e gardës.
Në gadishmëri do të qëndrojnë dhe autobotet me ujë për të shpërndarë turmat si edhe shërbimi zjarrfikës dhe ai shëndetësor. Pasdite pritet që të ketë edhe kufizime trafiku në Bulevardin ‘Dëshmorët e Kombit” dhe rrugët lidhëse me të.
Discussion about this post