Në destinacionin e tyre të fundit bazuar në itinerarin e publikuar nga opozita, protestuesit me thirrjet ‘lironi vëllezërit tanë’ kanë mbërritur tek Drejtoria e Policisë së Tiranës.
Me të mbërritur në Drejtorinë e Policisë disa prej protestuesve kanë thyer xhamat e institucionit në shenjë revolte për arrestimet e 50 protestuesve të 11 majit dhe procedimin e mbi 30 të tjerëve.
Sipas raportimeve nga terreni ka pasur trazira dhe hedhje të tymuesve drejt efektivëve të policisë.
Ndërkohë që në këtë institucion ka një shtim të forcave të policisë të cilat janë në dy kordone për të shmangur konfrontimet e mundëshme.
Protesta e sotme e opozitës është e pesta e thirrur nga krerët e PD-së dhe LSI-së për shkak të precipitimit të dhunës të protestës së 11 majit, ku u hodhën shishe me benzinë, shashka dyshohet dhe bomba molotov. Protestuesit i vunë flakën derës kryesore të Kryeministrisë, ndërsa hodhën dhe shishe me bojë drejt godinës. Dhuna precipitoi dhe pas zhvendosjes së protestuesve të Parlamenti ku u hodhën mjete piroteknike drejt forcave të policisë, ndërsa këta të fundit u përgjigjën me gaz lotsjellës.
Sipas raportimeve zyrtare mbetën të plagosur 13 policë dhe 4 protestues.
Protesta kulmoi me dhunën e policisë dhe arrestimin e sekretarit organizativ të PD-së, Sahit Dollapi çka çoi në irritimin e turmës e cila më pas e zhvendosi përplasjen tek Drejtoria e Policisë Tiranë.
Dollapi u shoqërua në Spitalin e Traumës pak orë pas ndalimit të tij për shkak të plagëve që mori, ndërsa u lirua nga arresti në orët e paradites së djeshme. Ai vijon të qëndrojë i shtruar në këtë spital.
Ndërkohë drejtuesit e forumeve të larta të PD-së dhe LSI-së pak pas mesnate, teksa gdhinte e diela vendosën mbajtjen e një proteste tjetër të madhe ditën e hënë, më 13 maj për shkak të dhunës policore të paprecedent.
