Ish-mbreti i Belgjikës do të gjobitet me 5000 euro në ditë, pasi nuk pranon të kryejë një test atësie, për të zgjidhur një çështje të hershme ligjore ku një grua pretendon se është vajza e tij.
Agjencia e lajmeve Reuters raporton se Mbreti Albert II, 84 vjeç, duhet të paguajë shumën e caktuar për çdo ditë që ka refuzuar të zbatojë urdhrin e Gjykatës, dhënë vitin e kaluar, duke bërë që artistja Delphine Boel, 50 vjeç, e cila pretendon se është vajza e tij, të përfitojë kështu një shumë të majme.
Avokati i Mbretit, Guy Hiernaux, tha për CNN se Alberti nuk ka ndonjë arsye të të refuzojë testin, pasi do të mbetet anonim.
Nëse ai rezulton vërtet të jetë babai, zonja Boel do të marrë emrin Delphine Van België dhe me dekret mbretëror mund të përfitojë edhe titullin e Princeshës.
Alberti, i cili abdikoi nga froni gjashtë vjet më parë duke ia lënë atë djalit të tij Philippe, nuk e pranon pretendimin e Boel dhe prej një dekade palët janë përplasur në Gjykatë. Deri tani është vërtetuar përmes testit të ADN-së vetëm se zonja Boel nuk është e bija e babait të saj ligjor, Jacques Boel, trashëgimtar i një prej dinastive më të pasura industrialiste të Belgjikës.
Alberti, nuk kryen asnjë detyrë publike, ka pranuar se martesa e tij kishte vështirësi. Të tre fëmijët e tij me Mbretëreshën Paola janë më të mëdhenj në moshë se Boel. Trashëgimtare e fronit tani është Princesha 17-vjeçare Elisabeth, vajza e Mbretit Philippe dhe Mbretëreshës Mathilde.
Discussion about this post