Një delegacion i Kongresit Amerikan ka zbarkuar sot në Tiranë, dhe po zhvillon takime me krerët më të lartë të shtetit. Delegacioni që shoqërohet dhe nga zv.ambasadorja amerikane Leyla Moses One, është pritur në takim nga presidenti Meta, kryeministri Rama, dhe pas mesdite do të ketë takime dhe me Gramoz Ruçin, si dhe me krerët e opozitës.
Në fokus të takimit, sipas zyrës së shtypit të presidentit Meta, ka qenë dhe situata politike në vend, si dhe zbatimi i menjëheshëm i Reformës në Drejtësi, në mënyrë që vendi të kthehet në shinat kushtetuese. Ky delegacion kryesohet nga Damon Wilson, ndërsa nuk dihet nëse amerikanët do të marrin rolin e negociatorëve për zgjidhjen e krizës politike në vend.
Njoftimi i presidencës për takimin:
Presidenti Meta priti një delegacion të stafeve drejtuese të Senatit e Kongresit Amerikan dhe Këshillit të Atlantikut
Presidenti i Republikës Sh.T.Z Ilir Meta priti sot një delegacion me përfaqësues të stafeve drejtues të Senatit e Kongresit Amerikan, si dhe të Këshillit të Atlantikut me qendër në Uashington DC, të kryesuar nga z.Damon Wilson.
Presidenti Meta njohu delegacionin mbi zhvillimet dhe sfidat në rajon, prioritetet e Shqipërisë në kontekstin e integrimit europian, si edhe me domosdoshmërinë e bashkëpunimit strategjik midis Shqipërisë dhe SHBA.
Zhvillimet e brendshme politike, zgjidhja sa më e shpejtë e krizës aktuale dhe nevoja për reflektim të menjëhershëm, zbatimi e implementimi i reformës në drejtësi mbështetur në shinat kushtetuese, hedhja e hapave të nevojshme drejt integrimit në BE dhe roli i rëndësishëm i Shqipërisë në rajon si faktor kyç për stabilitetin, ishin temat kryesore të diskutimit.
(E.K/Faxweb.al)
