Ndërkohë që ka nisur grumbullimi i protestuesve përballë godinës së Kryeministrisë për protestën e 7 kombëtare të mbajtur nga opozita ditën e sotme, sipas informacioneve të siguruara nga reporterët e Fax News në terren duket protesta e sotme pritet të jetë paqësore, ndërsa 250 të rinj të FRPD-së kanë dalë në rrugë me shirita të bardhë në duar për të siguruar qetësinë gjatë protestës.
Synimi i opozitës për një protestë paqësore, në fakt duket qartë edhe nga fotot e mëposhtme ku dhjetra tullumbaca të bardhë pritet të lëshohen gjatë protestës. Një detaji interesant është se ndryshe nga herët e tjera ku tullumbacat ishin me ngjyrë të zezë, sot protestuesit pritet të lëshojnë tullumbaca me ngjyrë të bardhë, ndërsa sërish sikurëse në protestat e tjera ato pritet të mbajnë mbishkrimin “Rama ik”.
Po ashtu bëhet me dije se godina e Kryeministrisë është e rrethuar me dhjetra efektivë policie.
Ndërkohë, kujtojmë se protesta e sotme kombëtare e opozitës vijon me kërkesat e pandryshuara që në muajin Shkurt për dorëheqjen e kryeministrit Edi Rama dhe krijimin e një qeverie tranzitore. Ndërsa me socialistët që kanë nisur fushatën elektorale, për demokratët e LSI-në bëhet gjithnjë e më e vështirë kauza e tyre për zgjedhjet e parakohshme.
Kreu i qeverisë Edi Rama dhe socialistët nisën dje fushatën elektorale për zgjedhjet lokale të 30 Qershorit, që janë të parat, që pas rënies së regjimit komunist, që do të zhvillohen pa praninë e opozitës.
Rama duket i vendosur që të mos tërhiqet nga zgjedhjet e datës 30 Qershor, pasi sipas tij zgjedhjet janë demokratike për sa kohë që opozita nuk është penguar që të jetë pjesë e tyre. Ndërkombëtarët kanë shpeshtuar thirrjet e tyre që palët politike të ulen në dialog, në mënyrë që të shmangen aktet e dhunës.
Opozita ka kërkuar leje që në mesnatë, dhe zërat thonë se skenari i protestës do të jetë një marshim në drejtim të institucioneve më të rëndësishme në vend.
Ndërsa kryedemokrati Basha, sipas burimeve nga PD pas protestës së sotme, rreth orës 3 të mëngjesit të nesërm pritet të niset në një vizitë drejt Berlinit, ndërkohë që sinjale nga Gjermania kanë bërë thirrje që palët të ulen sa më parë në dialog, dhe të mos përjashtohet asnjë çështje nga diskutimi. Ndërsa po ashtu mësohet se me vizitën e tij në Gjermani, Basha ka për qëllim të kërkojë mbështetje sa më të gjërë për kauzën e opozitës.
Discussion about this post