Ka nisur seanca në Gjykatën e Shkodrës për Bardh Spahinë, ish-deputetin demokrat i cili u arrestua nga ana e policisë të enjten.
Ajo që bie në sy në pamjen e Spahisë, është se ai ka të njëjtat rroba si në ditën e arrestimit, duke lënë të kuptohet se ai nuk është lejuar të takohet me familjarët e tij.
Spahia do të mbrohet nga avokati Ivi Kaso, përfaqësues ligjor i Partisë Demokratike. Vlen të theksohet se seanca ndaj ish-deputetit po zhvillohet e ndarë nga ajo e punonjësve të Bashkisë së Shkodrës.
Nga ana tjetër në hyrje të Gjykatës së Shkodrës ka pasur një prani shumë të madhe të punonjësve të policisë së rendit dhe të FNSH-së, që sipas demokratëve është e paprecedentë.
Spahia u arrestua nga policia mbrëmjen e së enjtes, me pretendimin se kishte qenë organizator i protestës pranë një prej KZAZ-ve në Shkodër, të cilës iu vu flaka nga ana e qytetarëve.
Nga ana tjetër PD e ka cilësuar një arrestim politik veprimin e policisë, dhe ka kërkuar nga policia lirimin e menjëhershëm të tij.
Basha u shpreh mbrëmë se një nga kushtet për dialog me PS-në përveç largimit të Ramës është dhe lirimi i të burgosurve politik, me në krye Spahinë, si dhe vënia përpara drejtësisë e blerësve të votave.
(E.K/Faxweb.al)
Discussion about this post