Gazetarja e Fax News Fatmira Bajrami ka qenë sot në fshatin Ngraçie të Mallakastrës që bojkotoi masivisht zgjedhjet e të dielës së 30 Qershorit. Nga 243 votues që kishin të drejtën e votës në këtë fshat, vetëm një zonjë është ajo që ka pranuar që të votojë.
Zonja që ka votuar u shpreh në Fax News se mbi të nuk ka pasur asnjë presion, dhe ajo ka zbatuar të drejtën e saj si qytetare: Unë si qytetare e Republikës së Shqipërisë, zgjodha që të votoj, nuk jam në punë në shtet. Shpresoj që të bëhet diçka ndryshe, pasi në fshatin tonë nën udhëheqjen e Kapllanajt nuk ka pasur asnjë investim.
Nuk e di mendimin që kanë pasur banorët e tjerë, por di arsyet e mia se pse votova. Nuk do të votoj në 13 Tetor, pasi zgjedhjet nuk mund të zhbëhen. Nuk jam juriste, ama e di që një gjë e tillë nuk mund të ndodhëm, fëmijët i kam nën moshë, ndërsa burri ndodhet në Greqi. Nuk kam marrë asnjë premtim për vende pune, as ndihmë ekonomike nuk më është dhënë, pavarësisht se pjesa tjetër e fshatit ka përfituar.
Ndërkohë që një prej banorëve që nuk ka votuar u shpreh për Fax news se ai nuk mund të vepronte si të ishte sërish në komunizëm: Në radhë të parë këto nuk ishin zgjedhje, këtu nuk kishte alternativë. Ne nuk jemi më në monizëm, nga monizmi unë kam një kujtim me veten time, zihej radha që në gjashtë. Unë u vonova pak se lidha lopën, kur erdha unë donin të hiqnin kutitë se kishin votuar të gjithë.
Më mori sekretari i partisë me shqelma, as fëmijët e mi nuk kanë votuar. I gjithë fshati e mori vendimin në kokën e tija. Kryetari i Bashkisë në zonën e Mallakastrës ka punuar, ishim me rrugë dhish dhe ka punuar. Po nuk është kjo e gjitha, ne do e votonim po të ishte prapë kandidat. Mua ma merr mendja se këto zgjedhje nuk do të njihen dhe do përsëriten, po të bëhen mendoj se do të shkojë e gjithë Shqipëria. Me krijimin e Gjykatës Kushtetuese unë mendoj se këto zgjedhje do të anullohen.
(E.K/Faxweb.al)
Discussion about this post