Presidenti amerikan, Donald Trump ka lëshuar një deklaratë të fortë dhe të papritur njëkohësisht për rikthimin sërish të Rusisë në grupin e vendeve më të industrializuara të botës, teksa nuk ka nguruar që të akuzojë paraardhësin e tij, Barack Obama për përjashtimin e Moskës.
Ai tha se dëshiron që Rusia të kthehet në takimet e Grupit të Shtatë vendeve më të industralizuara të botës, edhe pse ende kontrollon gadishullin e Krimesë.
Moska u përjashtua nga grupi G-7 për shkak të aneksimit të gadishullit të Krimesë në vitin 2014, ndërsa kjo e fundit ndërkombëtarisht njihet si pjesë e Ukrainës.
Ndërsa udhëheqësit e G-7-ës shkojnë në qytetin bregdetar francez të Biarritzit në Atlantik për takimin e tyre vjetor këtë fundjavë, Presidenti Trump tha se do të kishte kuptim që Presidenti rus Vladimir Putin të ishte përsëri pjesë e grupit.
“Është një votë për atë që tani është G7. Ata u nxorrën jashtë sepse Putini mori me mençuri Krimenë dhe shmangu vijat e kuqe për këtë çështje dhe për gjëra të tjera. Ia hodhi Obamës. Obama u irritua. E nxorrën jashtë lojës. Mendoj se Rusia duhet të jetë pjesë e grupit sepse ne jemi në kërkim të paqes botërore, tregtisë dhe gjërave të tjera. Dhe do të ishte shumë më e lehtë ta kishim Rusinë atje ku ka qenë gjithmonë”, mësohet të ketë thënë Trump.
Pjesë e grupit G-7 janë Kanadaja, Franca, Gjermania, Italia, Japonia, Britania e Madhe dhe Shtetet e Bashkuara. Ndërkohë nuk është e qartë nëse ndonjë nga vendet e tjera e mbështesin rikthimin e Rusisë në G-7 për ta bërë atë përsëri G-8.
Discussion about this post