Janë zbuluar emrat e dy prokurorëve që do të hetojnë dosjen 184 ku janë akuzat për shitblerjen e votave në bashkinë e Dibrës në 2016.
Rifat Kojku dhe Belina Zeneli janë prokurorët që janë caktuar nga drejtuesja e Prokurorisë së Dibrës.
Dosja iu dërgua për kompetencë nga Prokuroria e Përgjithshme pasi u ndryshua vepra penale dhe nuk kishim të bënim me “bashkëpunim në formën e grupit të strukturuar kriminal”
Prokuroria për Krime të Rënda hoqi dorë nga hetimi i dosjes së bujshme 184, ku zyrtarë të lartë socialistë dëgjohen në përgjime në biseda për blerjen e votës, në zgjedhjet e pjesshme vendore për Bashkinë e Dibrës në shtator të 2016, pas shkarkimit të Shukri Xhelilit, që u përfshi në një skandal seksual, duke e transferuar atë në Dibër.
Kalimi i dosjes nga Krimet e Rënda te Prokuroria e Dibrës çoi në përplasje mes tyre. Shkak u bë vendimi i Prokurorit të çështjes Klodian Braho për të shpallur “moskompetencën” për procedimin penal të nisur që prej tre vjetësh, pasi më parë ka ndryshuar cilësimin juridik të një prej veprave penale për të cilat është rregjistruar ky procedimi atë të “Grup i strukturuar kriminal”, në “Bashkëpunim të thjeshtë”.
Prokuroria e Dibrës ka kundërshtuar kalimin e dosjes pranë saj, dhe në kushtet e kësaj përplasjeje, ka qenë Prokurorja e Përgjithshme e përkohshme Arta Marku e cila ka marrë vendimin përfundimtar. Marku dha para disa ditësh një shpjegim të gjatë të situatës së krijuar. Një nga arsyet e kundërshtimin nga Prokuroria e Dibrës ka qenë se “prokurori duhet t’i ishte drejtuar gjykatës për pushimin e akuzave dhe jo të procedonte me ndryshim të cilësimit juridik”.
Discussion about this post