Elseid Hysaj do të jetë mungesa e madhe e kombëtares kuqezi për dy eliminatoret e radhës, ndaj Turqisë dhe Moldavisë. Dëmtimi i rrezikshëm që pësoi shkodrani në sfidën e fundit të Serie A, në fushën e Torinos, penalizoi edhe trajnerin Edy Reja. Deri mesditën e sotme, italiani nuk kishte preferuar ta zëvendësonte kapitenin me dikë tjetër, nga lista e pritjes, por së fundi ka ndryshuar mendje. Ai ka kërkuar që të vihet në dispozicion të tij Hysen Memolla, mbrojtësi që luan në Finlandë, me Kokkolan Pallo-Veikot.
Madje, futbollisti kavajas ka shënuar edhe tre gola për skuadrën e tij, në Veikkausliiga, këtë kampionat, ku po luan rregullisht. Si duket, nisur nga forma e mirë që po kalon 27-vjeçari, trajneri ynë kuqezi ka vendosur ta ketë “nënë armë”. Me siguri do të shfrytëzojë rastin për ta njohur më nga afër, pasi Memolla nuk është grumbulluar asnjëherë nën drejtimin e 73-vjeçarit italian.
Ishte paraardhësi i tij, Christian Panucci, ai që e pikasi dhe e ftoi në kombëtare për herë të parë. Memolla ka luajtur në dy ndeshje me kuqezinjtë, por me kohë mjaft të limituar, vetëm 63 minuta në total. Aktivizimet e tij janë ndaj Spanjës (humbjen 3-0) dhe Maqedonisë së Veriut (barazimin 1-1). Të dyja këto ndeshje i përkasin vitit 2017.
Discussion about this post