Opinioni final i Venecias, presidenca konferencë të jashtëzakonshme

Pak orë pasi ka dalë opinion përfundimtar i Komisionit të Venecias, në presidencë do të ketë një deklaratë për mediat.

“Ne Institucionin e Presidences ne oren 17:00 Konference per Shtyp”, njofton zyra e shtypit.

Nuk bëhet e ditur nëse do të jetë vetë presidenti Meta ai që do të ketë një komunikim me gazetarët, apo për opinionin e venecias do të komentojnë këshilltarët e tij.

Faxweb.al ka zbardhur sot opinionin final të Komisionit të Venecias, për shkarkimin ose jo të presidentit Meta, pas vendimit të tij për të shtyrë zgjedhjet lokale të 30 Qershorit.

Venecia shprehet se dekreti i Metës për shtyrjen e zgjedhjeve është tejkalim i kompetencave të tij, por nuk përbën shkelje që mund të pasojë me shkarkimin e kreut të shtetit.

Megjithatë Komisioni shprehet se i takon Kuvendit dhe më pas Gjykatës Kushtetuese për t’u shprehur përfundimisht lidhur me këtë çështje.

“Edhe pse Presidenti mund të ketë tejkaluar kompetencat duke shtyrë zgjedhjet vendore, nisja e procedurave të shkarkimit mund të mos jetë e justifikuar.

Ekspertët e Komisionit të Venecias dalin në përfundimin se, pavarësisht se Presidenti mund të ketë vepruar në tejkalim të fuqive të veta Kushtetuese, ka indikacione se veprimet e tij mund të mos kenë qenë të një natyre të atillë sa të justifikojnë nisjen e procedurave të shkarkimit.

Në opinionin e miratuar sot, që është kërkuar nga Kryetari i Kuvendit të Shqipërisë, Gramoz Ruçi, Komisioni i Venecias vëren se Presidenti i Shqipërisë nuk mund të anulojë zgjedhjet pa konsensus politik. Edhe në rast të një gjendjeje të jashtëzakonshme, si luftë apo katastrofë natyrore, Parlamenti duhet të miratojë një ligj të posaçëm për të shtyrë zgjedhjet.

Si kundërpërgjigje ndaj krizës politike në vend dhe bojkotit nga disa parti politike kryesore, Presidenti në fillim i anuloi zgjedhjet e më pas i shtyu ato. Pavarësisht se Parlamenti vendos se Presidenti tejkaloi kompetencat e tij, Komisioni i Venecias ka dyshime nëse këto ishin të atilla sa të konsideroheshin “shkelje të rënda”.

Ekspertët nënvijëzojnë thirrjen e Presidentit për dialog dhe pritshmërinë se shtyrja e zgjedhjeve do të kishte kontribuar në arritjen e një kompromisi mes partive. Ata theksojnë mungesën e ankimimit të dekreteve të Presidentit në Gjykatë.

Për më tepër, zgjedhjet vendore nuk kanë të njëjtin status kushtetutshmërie si zgjedhjet parlamentare. Ekspertët thonë që, pavarësisht se Parlamenti do të vendose se shkeljet ishin të rënda, kjo nuk do të duhet të sillte domosdoshmërish nisjen e procedurave të shkarkimit, duke marrë në konsideratë objektiva të tjerë kushtetues, si ruajtja e balancave dhe stabiliteti i vendit.

Nëse Parlamenti vendos pro shkarkimit do t’i takojë Gjykatës Kushtetuese që të konfirmojë nëse vendimet e Presidentit përbëjnë shkelje aq “të rënda” sa për të justifikuar shkarkimin e tij”

(E.K/FAXWEB.AL)