Përgjigja e Komisionit të Venecias, reagon menjëherë presidenti Meta

Presidenti Ilir Meta ka reaguar pas publikimit të draft opinionit zyrtar të Komisionit të Venecias në lidhje me çdekretimin e zgjedhjeve të 30 qershorit dhe shtyrjen e tyre.

Meta shkruan se vlerëson opinionin përfundimtar të Komisionit dhe se sipas tij konfirmoi të gjitha qëndrimet e presidentit të Republikës.

“Si asnjëherë tjetër, Opinioni përfundimtar pësoi ndryshime thelbësore nga projekti paraprak.
Ndër konkluzionet kryesore u evidentua se:
1. Presidenti i Republikës nuk ka shkelur Kushtetutën dhe nuk ka tejkaluar kompetencat e veta kushtetuese.

2. Presidenti i Republikës pati qëllim legjitim, që synonte shmangien e gjakderdhjes, mbrojtjen e pluralizmit politik, ruajtjen e stablitetit dhe të kredencialeve demokratike të vendit.

3. Kompetencat kushtetuese të Presidentit nuk janë formale.

4. Dekretet e Presidentit janë në fuqi dhe nuk u sfiduan përpara asnjë gjykate.

5. Zgjedhjet parlamentare kanë status më të lartë kushtetues se zgjedhjet vendore.

Presidenti i Republikës shpreh keqardhjen që gjatë katër muajve u shpërdoruan energji që do të duhet të ishin në shërbim të integrimit europian të Shqipërisë dhe vendimit të shumëpritur për çeljen e negociatave të anëtarësimit në BE.”– shkruan Meta.