Pas barazimit me Lecce dhe humbjes në fushën e Romës, në përpjekjen e tretë vjen fitorja e parë për Milanin e ri të Stefano Piolit. Kuqezinjtë fituan minimalisht në “San Siro”, kundër SPAL, falë një goditjeje të lirë të Suso.
Pioli, duke folur në mikrofonat e “Sky Sport”, pas ndeshjes, komentoi performancën e ekipit të tij: “Veçanërisht kërkova shpirtin e garës te lojtarët e mi dhe mendoj se ishte i duhuri. Kemi rrezikuar pak, por kemi ndërtuar aksione të mira shënimi. E kemi mbajtur rezultatin të hapur deri në fund, por besoj se mund të fitojmë dhe të vuajmë njëherësh.
Në fokusin tonë është gjithmonë e ardhmja. Jam i lumtur për lojtarët, për klubin, për tifozët, por tani duhet të mendojmë menjëherë për sfidën e radhës, sepse do të përballemi me një kundërshtar të fortë. Sonte pashë gjëra të mira, por ka dhe të tjera, për të cilat duhet të punojmë. Suso? Ai është një lojtar i shkëlqyer, mendoj se mund të bëjë më shumë. Si trajner jam i lumtur që kam një lojtar me këto karakteristika. Sidoqoftë, duhet të fillojmë të mendojmë si ekip. Nuk humbasim dhe nuk fitojmë kurrë nga një lojtar i vetëm. Sonte Milani punoi si ekip, kundër një kundërshtari që na vuri në vështirësi. Nuk e prisnim SPAL të na vinte aq lart, kështu që duhej të luanim në thellësi dhe vërtet duhej të bënim më shumë.
Leao? Mendova ta aktivizoja, nëse nuk do të ishim në gjendje ta zhbllokonim rezultatin. Kemi shumë elementë cilësorë dhe ndoshta mund të luajmë më të decentralizuar sesa me Piatek si pikë referimi, por kur të kemi më shumë ekuilibër. Objektivi? Milani mund të rritet. Nëse jeni të bindur, gjithçka është e mundur. Le të përballemi me ndeshjet seriozisht dhe të luftojmë si sonte. Vetëm me cilësi, ndeshjet nuk fitohen më. Kundërshtarët janë të fortë dhe kanë nevojë për organizim e shpirt të lartë gare. Në këtë mënyrë mund të mundni edhe ekipet më të forta”.
Discussion about this post