Gent Cakaj duket se do të jetë “viktima” e parë e fitores së Albin Kurtit në zgjedhjet e Kosovës, të cilat u mbajtën në 6 Tetor.
Pas takimit prej disa orësh të liderit të Vetëvendosjes me kryeministrin Edi Rama, pak ditë më parë në Tiranë, duket se një nga kërkesat e Kurtit ka qenë largimi i Cakajt pasi ky i fundit është pjesë e lidhjeve të vjetra me Hashim Thaçin.
Po ashtu fatin e tij pritet ta ketë dhe ministrja tjetër nga Kosova, Besa Shahini, pasi të dy shtetet duhet të kenë një koordinim të plotë në politikat e tyre të jashtme dhe të brendshme.
Rama përmes këtij lëshimi do të zgjidhte dhe ngërçin me mosdekretimin e Cakajt nga presidenti Meta, ku kreut të qeverisë dejuro i duhet që të bëjë dhe rolin e Ministrit të Jashtëm, pasi Cakaj vepron vetëm si i deleguar.
Burime të sigurta bëjnë me dije për Faxweb.al se postin e Cakajt në ministrinë e jashtme mund ta zërë Elisa Spiropali, e cila përkohësisht mund të pengohet nga shtatzënia e saj e dytë, mirëpo gjithçka mund të jetë gati fillimin e vitit të ardhshëm.
Lëvizja e Cakajt dhe dekretimi i Spiropalit do të sillte dhe një rifreskim sa i takon politikës së jashtme, veçanërisht pas refuzimit për të disatën herë që BE i bëri vendit tonë për çeljen e negociatave të anëtarësimit.
(E.K/Faxweb.al)
Discussion about this post