“Jemi kushërinj të brezit të tretë”, kjo ishte kryefjala e asaj që tha Rrahman Rraja, deputeti i PS-së në studion e lajmeve të Fax News, pas arrestimit të të afërmit të tij, Redjan Rraja, si i dyshuar për atentatin ndaj prokurorit Arjan Ndoja në afërsi të Shkozetit në Durrës.
Në ndryshim nga shefi i tij në krye të partisë, Rrahman Rraja dënoi atentatin ndaj prokurorit, duke e quajtur atë një sulm ndaj drejtësisë që po reformohet.
Rrahman Rraja tha më tej se me kushëririn e tij, ka më shumë se 4 muaj që nuk takohej, dhe nuk ështe ne dijeni te aktiviteteve te tij.
“Në radhë të parë dua të sqaroj sa i përket lajmeve që kanë dalë, unë nip quaj djalin e motrës dhe të vëllait, ose të vajzës ose të djalit.
Unë me Redjanin jemi më shumë sesa brezi i tretë, ky është një rast që duhet dënuar nga të gjithë, sepse në kohën kur presim që drejtësia të jetë sa më e fortë dhe më e ndershme, i bëhet atentat një prokurori.
Redjani nuk ka pasur lidhje fare me rastin Xhisiela, babi im me gjyshin e Redjanit kanë qenë vëllezër vetëm nga babai, se gjyshi eshte martuar dy here. Ai nuk jeton në Nikël, dhe kam më shumë se 4 muaj që nuk e takoj. Para një viti ka qenë së bashku me familjen në Kanada, nuk di më shumë”, u shpreh Rraja.
Redjan Rraja u arrestua nga ana e policisë si një nga të dyshuarit për atentatin ndaj prokurorit Ndoja, Landi Muharremit dhe Andi Malokut.
(E.K/Faxweb.al)
