Sulmi ndaj punonjësve të IKMT-së, Gjykata jep vendimin për banorin e arrestuar

Pak minuta më parë, Gjykata ka vendosur masën “Arrest shtëpie” për 50 vjecarin Shpëtim Selimi.

Tre ditë më parë, situata u bë e nxehtë në Astir, për shkak se punonjësit e IKMT-së, paralajmëruan banorët që të lirojnë shtëpitë e tyre deri ditën e hënë, pasi më pas do të nisë aksioni për shembjen e tyre.

Por kjo gjë ka sjell edhe përplasjen e banorëve me punonjësit IKMT-ë dhe punojësve të policisë.

Nga ky incident kanë mbetur 4 punonjë të IKMT-së dhe 1 punonjës i Policisë, të plagosur. Përveç Shpëtim Selimit, janë shpallur në kërkim dhe 7 persona të tjerë me inicale J.M., S.H., F.D., V.D., L.K., Sh.N. dhe G.S.

Njoftimi i policisë: 

9 të proceduar për sulmin me gurë e sende të forta ndaj punonjësve të IKMT-së dhe punonjësve të Policisë.

Më datë 07.11.2019, në rrugën “Teodor Keko”, Tiranë, rreth orës 10:45, një grup personash, në bashkëpunim me njëri-tjetrin kanë goditur me gurë e sende të forta punonjësit e IKMT-së dhe punonjësit e Policisë, të cilët ishin duke bërë njoftimin e bizneseve që preken nga projekti i rrugës.

Si pasojë e sulmit me gurë dhe sende të forta mbetën të plagosur 4 punonjës të IKMT-së dhe 1 punonjës i Policisë. Gjithashtu, gjatë sulmit me gurë e sende të forta ndaj punonjësve të IKMT-së dhe punonjësve të Policisë, është dëmtuar edhe një automjet i Policisë.

Në lidhje me ngjarjen, specialistët për Hetimin e Krimit në Komisariatin e Policisë Nr. 2, në përfundim të veprimeve të para hetimore, bazuar edhe në pamjet filmike, bënë arrestimin në flagrancë të shtetasit Sh.S., 50 vjeç, banues në Tiranë.

Gjithashtu, u shpallën në kërkim dhe vijon puna për kapjen e 7 shtetasve: J.M., S.H., F.D., V.D., L.K., Sh.N. dhe G.S., të cilët pas sulmit mbi punonjësit e IKMT-së dhe të Policisë janë larguar me shpejtësi nga vendi i ngjarjes.

Në vijim të veprimeve u procedua penalisht në gjendje të lirë edhe shtetasi E.D., 35 vjeç, banues në Tiranë.

Materialet procedurale i kaluan Prokurorisë së Rrethit Gjyqësor Tiranë, për veprat penale “Shkatërrim prone”, “Kundërshtim i punonjësit që kryen një detyrë shtetërore ose një shërbim publik” dhe “Goditje për shkak të detyrës”, në ngarkim të shtetasve Sh.S., J.M., S.H., F.D., V.D., L.K. dhe Sh.N., si dhe në ngarkim të shtetasit G.S., për veprat penale “Thirrje publike për veprime të dhunshme”, “Shkatërrim prone”, “Kundërshtim i punonjësit që kryen një detyrë shtetërore ose një shërbim publik” dhe “Goditje për shkak të detyrës”.

(K.H/Faxweb.al)