Kryeprokurorja e përkohshme në detyrë, Arta Marku ka vendosur të ankimojë renditjen e Këshillit të Lartë të Prokurorisë për Prokurorin e ri të Përgjithshëm.
Kjo lëvizje e Markut vjen në një kohë që KLP ia ka dorëzuar renditjen Parlamentit. Në krye të listës së KLP qëndron Olsian Cela, ndërsa Arta Marku është e dyta.
Marku qëndron në postin e kryeprokurores prej 2 vitesh. Ajo u zgjodh në këtë detyrë vetëm me votat e mazhorancës, ndërsa kandidatura e saj ka qenë e anatemuar vazhdimisht nga opozita. Zgjedhja e saj u cilësua si antikushtetuese, ndërsa betimi i Markut në Parlament u shoqërua me protesta nga PD-LSI dhe trazira.
Pak ditë më parë Arta Marku u intervistua nga Këshilli i Lartë i Prokurorisë sepse ka shprehur interesin për të vijuar detyrën e kryeprokurores, por këtë herë me mandat të plotë 7-vjeçar.
Në fund të intervistave, KLP renditi të parin Olsian Çelën me 459 pikë, më pas Arta Marku me 406 pikë, kurse në vend të tretë u rendit Fatjona Memçaj me 362 pikë.
KLP bëri këtë renditjen të enjten dhe dha 3 ditë afat për ankimim. Duke përjashtuar ditët e fundjavës, dita e sotme duhet të ishte dita e fundit për ankimim, por nuk dihet nëse Marku kishte ende afat për ta kryer një diçka të tillë.
Për këtë çështje pritet të shprehen organet kompetente, për të kuptuar nëse lëvizja e saj ishte brenda afatit ligjor.
