Kryeministri Edi Rama në mbledhjen e sotme të qeverisë, ku shpalli gjendjen e emergjencës në zonën e Durrësit dhe Thumanës, nuk iu shpëtoi as polemikave me kundërshtarët politikë.
Sipas kreut të qeverisë, ky ishte një moment reflektimi dhe për ta, për të kuptuar se detyra e tyre është të qeverisin njerëzit, dhe nuk mund të merren me gam-gam-istët.
“Ka kaq shumë gam gam, gam gam gam gam, dhe këta gamgam-istët kanë kthyer në skllevër të gam-gamit dhe qytetarët, është koha që të reflektojmë dhe mbi këta, së paku për të mos harruar këtë, që ne nuk mund të jemi në korin e gam gam-it.
Fare mirë mund të kishte qenë secili prej nesh i prekur nga kjo tragjedi, mund të ishin familjet tona që sot mund të ishin gdhirë me një, dy, ose më shumë anëtarë më pak. Larg qoftë, edhe mbase mirë që më erdhi në mendje dhe e thashë se na duhet për syrin e keq”, tha Rama.
Ndërkohë që në mbledhje Rama dha dhe arsyet se pse nuk u shpallën 3 ditë zie kombëtare, por vetëm 1.
“Sot qeveria do të miratojë vendimin për ditën e zisë kombëtare. Këtu dua të shpjegoj se kjo ditë duke qenë se pararend dy ditëve të festave kombëtare e ka bërë të pamundur që të ishte më shumë sesa një ditë zie, sepse do të kishim dashur të ishte 3 ditë zie. Na ka pamundësuar që të imagjinojmë flamurin shqiptar në gjysmë shtizë në 28 dhe 29 nëntorit ashtu sikundër është një normë e afirmuar se asnjëherë në ditët kombëtare të vendeve nuk mund të ketë zi.
Sepse janë ditë që kanë brenda një kujtim të jetëve të dhëna për atdheun. Dy ditët më të rëndësishme të kalendarit, 28-29 nuk mund të jenë ditë me përmbajtje festive. Por me gjithë solemnitetin e nevojshëm dhe domosdoshmërinë për të mos e shkëputur vëmendjen nga situata akute. Mendoj të shihen si dy ditë solidariteti kombëtar, ku respekti për të shkuarën që ato mishërojnë të njehsohet me kontributin e gjithkujt që mund të ndihmojë”, tha Rama në mbledhje.
(E.K/Faxweb.al)
Discussion about this post