Partia Demokratike ka reaguar për votimin e pak minutave më parë në sallën e Parlamentit për kryeprokurorin e ri. Ishte ish-deputeti Flamur Noka ai i cili gjatë një interviste televizive komentoi veçanërsisht largimin e Arta Markut nga drejtimi i organit të akuzës.
Sipas tij, Marku u përdor për të mbyllur dosjet e Saimir Tahirit, atë të Dibrës për vjedhjen e votave dhe atë të vëllait të Fatmir Xhafajt, Geron Xhafajt. Noka tha se kjo duhet të shërbejë si mësim për të gjithë zyrtarët e tjerë që të mos lejojnë veten të përdoren nga pushteti.
“Komenti është shumë i thjeshtë, zonja Marku u përdor, u emërua në kundërshtim me kushtetutën, në kundërshtim me reformën në drejtësi. U përdor për arsyet për të cilat u emërua. E para ishte shkatërrimi i dojes së Saimir Tahirit, e dyta ishte mbyllja e çështjes së Dibrës për vjedhjen e votave dhe e treta mbyllja e dosjes së Geronit.
Për këto tre detyra u vu. E kreu misionin ajo. Ky është një mësim që duhet t’i vlejë çdo zyrtari, kur keqpërdoresh të hedhin”, deklaroi Flamur Noka. Nga ana tjetër, ai preferoi të mos komentonte figurën e kryeprokurorit të ri, Olsian Çelës sepse tha se nuk e njeh.
(M. I./ Faxweb.al)
