Ardit Gjebrea dhe unë i hedhim plehrat te i njëjti kazan

Nga Agim Xhafka 

Dua të jem i qartë qysh në rreshtat e parë. Ardit Gjebrenë e simpatizoj si moderator, si këngëtar,si menaxher i atij spektakli aq popullor që transmeton Klan të dielave. Shkurt ,jam fans i tij prej vitesh e vitesh. Veç kësaj edhe njihemi.

Nuk jemi miq të ngushtë, por e përshëndesim me respekt njëri tjetrin. Tani të hyjmë te problemi që dua t’ja bëj të ditur artistit tim. Te Kënga Magjike, në gjithë netët, ai nuk harroi t’i thurte lavde Erion Velisë, kryetarit të bashkisë së Tiranës dhe të thosh fjalë për fjalë se ai paska bërë ndryshime kolosale në kryeqytet.

Për fat unë dhe Arditi jemi dhe komshinj e po i them se ai jo vetëm që ia ka futur kot këtij perfundimi, por u bë dhe qesharak. Ja pse. Arditi dhe unë i hedhim plehrat te i njëjti kazan. Ka mbi pesë vjet që janë po ata kazanë që Lali i trashëgoi dhe ndërsa dikur kishin kapak tani rrinë hapur e në erën më të parë dalin nga kazani lloj e lloj mbeturinash e na bijen sipër.

Këtë quan ai ndryshim kolosal? Më tej, përballë meje dhe Arditit ka disa lokale dite që nuk mbyllen as kur vjen dita tjetër. Me muzikë në qiell dhe me banorë të pagjumë që nuk ua zgjidh hallin as policia e as bashkia. Ky a quhet ndryshim kolosal?

Tjetër. Rruga e Arditit dhe imja para se të vinte Lali ishte me dy gropa. Tani është gropa gropa. Për këtë e ke fjalën si ndryshim? Më parë paguanim fare pak lekë e ujë kishim më shumë. Tani kemi nga dy depozita për familje. Ndryshim quhet, por skandaloz, jo kolosal.

Që të mos rreshtoj rritjen e taksave, sidomos atë pér arsimin që e paguajnë edhe të moshuarit. Se do ndërtoheshin dhjetra shkolla e pas tërmetit u mësua që u rrëzuan pikërisht ato që gjoja u rregulluan. E sheh sa ndryshim paska bërë Tirana?

Do më? Një shi i lehtë bije dhe përmbytemi,ca lulishte kishim e mbi to po mbijnë kulla e kulla,ajér të ndotur gjeti,e ndoti më tej disafish. Po rreshtoj plot mbyllje rrugësh se ngrihen grataçiela e duhen krijuar kantieret e tyre mbi korsitë e mijra makinave që gulçojnë pa lëvizur.

Deri sot Lali mburret veç me sheshin që ka bérë pérshesh krejt qarkullimin e mjeteve në Tiranë. Një marrëzi që nesër do gjykohet si vepér penale.

Ndryshime kolosale,kështu u shpreh Gjebrea për Lalin. Kuptohet që do fliste broçkulla nga që Bashkia që sponsor i evenimentit. Pra ishte reklamë që u pagua dhe do transmetohej. Këtu qëndron gafa tjetër e Arditit. Pranon lekë për propagandë, në vend të reklamave. Mund të qe reklamë në se do të jepej një pyll që e kishte mbjellë Lali,n ë se do të ishte hapur një rrugë e re, në se do të ishte hequr qoftë një depozitë nga tarracat që rënkojnë prej peshës së ujit.

Po jo fjalë në tym që Erioni paska bërë punë kolosale në kryeqytet. Këto nuk i gëlltit askush,nuk i pranon as vetë mentori i Lalit, Edi Rama, i cili e urdhëroi Lali ziun të rrëmbente furcën dhe të lyente që në katër të mëngjesit shkallët e pallatit ku dolën në tv.

Ardit, ne jetojmë në një zonë ku Erion Veliaj nuk ka asnjë ndikim konkret, të prekshëm. Nuk e thashë kot që plehrat i hedhim te i njëjti kazan. Ndaj ti merr sa më tepër reklama nga bashkia, por mos bëj propagandën e Erionit se të bën pis. Ti je artist. Për mua je artist me shumë, shumë vlera.