Në krye të hetimit për pallatet e shembura në Durrës, KPK merr vendimin për prokuroren

KPK konfirmon në detyrë drejtuesen e Prokurorisë së Durrësit, Anita Jella, kandidate për SPAK.

Drejtuesja e prokurorisë së Durrësit, është dhe në qendër të vëmendjes mediatike kohët e fundit pasi po merret me hetimet e shembjes së dhjetëra pallateve në qytetin bregdetar pas tërmetit të 26 nëntorit.

Në seancë u bë me dije se ndaj Jellës ishin bërë hetime të thelluara mbi pasurinë dhe një sërë personash të lidhur, figurën e saj dhe të bashkëshortit si dhe mbi profesionalizmin. Relatorja vuri në dukje kalimin e barrës së provës mbi një apartament në Durrës dhe po ashtu edhe për shtëpinë e prindërve të bashkëshortit në Peqin.

Barrë prove po ashtu i ishte kaluar Jellës edhe mbi figurën e bashkëshortit –gjithashtu prokuror, për të cilin ishin kryer një sërë verifikimesh në Itali. Po ashtu, Jellës i ishin hetuar pas denoncimeve në media një sërë çështjesh. KPK bëri me dije se 20 dosje ishin marrë në shqyrtim pas denoncimeve në dy portale.

Nga relatimi rezultoi se Jella ishte rihetuar kryesisht mbi qëndrimin e saj si drejtuese e Prokurorisë së Durrësit sa i përket hetimeve ndaj drejtuesve të Agjencisë Shtetërore të Kadastrës për pronat në bregdetin e Durrësit dhe vonimin me disa ditë të ekzekutimit të urdhër-ndalimit të kërkuar nga një prej prokurorëve për një drejtues të lartë të ASHK-së.

Vëzhguesi ndërkombëtar, Theo Jacobs, siç doli në seancë, kishte vizituar prokurorinë e Durrësit në kërkim të informacioneve mbi këtë çështje. Jacobs ishte aktiv në seancë, ndërsa akuzoi Jellën për “punë të dobët” në një rast hetimi që ajo kishte ndjekur si prokurore dhe po ashtu vuri në dukje se kishte “mjegull mbi apartamentin” dhe qasje kontradiktore të saj nga pozicioni i drejtueses në dy çështje, që sipas tij linin dyshime se ishte favorizuar i pandehuri.

Jella sqaroi në seancë qëndrimet e saj sa i përket pasurisë, duke shpjeguar se ajo ishte vendosur me burime të ligjshme. Ajo solli një seri fotosh që i ishin kërkuar nga KPK. Ndërkohë, ajo mohoi akuzat e Jacobs dhe dha shpjegim për qëndrimet e saj në çështjet e përmendura. Jella tha se vonesa e pretenduar për çështjen e pronave justifikohej me faktin se në prokurori kishte njëkohësisht dy hetime për çështjen dhe se ajo kishte synuar të rakordonte prokurorët, duke i dhënë prioritet hetimit proaktiv që sipas saj rezultoi i sukseshëm.

Anita Jella është një ndër 15 prokurorët e zgjedhur nga Këshilli i Lartë i Prokurorisë për të qenë pjesë e Prokurorisë së Posaçme kundër Korrupsionit dhe Krimit të Organizuar, SPAK dhe procesi i vetingut është hallka e fundit që i duhet për t’u emëruar në këtë post.