Banorët janë gjendur përballë një situate të vështirë pas tërmetit që ra në datën 26 Nëntor. Shumë shtëpi u shkatërruan për shkak të lëkundjeve të forta të tokës, ndërsa qytetarët ndodhen jashtë në pritje të vendimit nëse banesat e tyre janë apo jo të banueshme.
Një prej banorëve të zonës së ShënVlashit në Durrës ankohet se edhe pse ka bërë disa herë kërkesa, institucionet janë indiferente sepse nuk sjellin ekspertë për të inspektuar shtëpinë e tij.
Në pamje të parë kjo banesë ka dëme të konsiderueshme dhe qytetari ka frikë të futet brenda. Për “FaxNews”, ai deklaroi se prej 21 ditësh tashmë flen në makinë, ndërsa familjarët e tjerë i ka dërguar në Itali.
“Dëmet më të mëdha kanë qenë në katin e parë. Shqetësimi kryesor është që ka pësuar dëmtime kolona. Është shkëputur fare. Unë nuk i kam prekur fare, vetëm disa gjëra të vogla që në pengonin se këtu ishte plot. Vetëm ekspertët mund ta dallojnë se çfarë dëmtimesh kanë. Unë rri në makinë, nuk jam futur fare sepse kam frikë.
Po të kishin ardhur ekspertët e të më thonin që futu, normal që do flija në shtëpi. Vetëm unë jam këtu. Të 6 të tjerët kanë ikur në Itali. Qysh ditën e dytë kam vajtur tek njësia administrative dhe bëra kërkesën edhe më thanë që shumë shpejt do të vijmë. Bëra kërkesë prapë, nuk erdhën.
Të paktën të shohin sesi është gjendja e shtëpisë. Deri në këto momente që po flasim askush nuk ka ardhur. As inxhinier, as teknik i ndërtimit, asnjë. Po flemë në makinë, për faqe të zezë. Në makinë flihet vetëm nga zori. Ata duhet të kishin ardhur të parë se ne jemi afër.
Banesa është bërë në vitin 1992. Kemi patur inxhinierë e ekspertë që të na thonë sesa hekur duhet. Të na ndihmojmë me lekë ose me diçka që nëse është e banueshme të fillojmë ta riparojmë, të nisim punën. Unë nuk kam mundësi financiare, 160 mijë lekë marr pension”, deklaroi banori.
(M. I./ Faxweb.al)
