Festat e fundvitit po afrojnë, ndërsa të gjithë besimtarët e krishterë po bëhen gati që në javën e re të festojnë Krishtlindjet. Por a do të ketë borë natën e Krishtlindjeve? Një lajm i keq vjen nga meteorologët për të gjithë ata që e dëshirojnë një gjë të tillë.
Stuhia “Elsa” ka pushtuar të gjithë Evropën, çka bën që për festat e fundvitit të mos ketë borë, por thjesht masa ajri të ngrohta dhe një qiell të vranët. Sipas “Euronews”, temperaturat pritet të arrijnë deri në 16 gradë Celcius në Palermo në Sicili në ditën e Krishtlindjes. Madje, edhe St. Petersburgu do të jetë i ngrohtë këtë vit. Temperaturat aty pritet të shkojnë deri në 5 gradë Celcius.
Gjasa të pakta që të ketë deborë për Krishtlindje ka edhe në Zvicër, për shkak të motit të ngrohtë. Diçka të tillë e bëri të ditur meteorologu Michael Krucker. Sipas tij, borë do të ketë vetëm në lartësitë prej mbi 1.000 metrash.
Edhe në Danimarkë, ku po ashtu mbizotëron një mot i ftohtë, këtë vit nuk do të ketë borë gjatë Krishtlindjeve. Sipas parashikuesit Steen Rasmussen, Danimarka do të ketë një javë të butë pa borë. Në Francë ndërkaq, ajri pritet të mbetet i ngrohtë ditët e ardhshme, me erëra të forta që “udhëtojnë” nëpër vend nga perëndimi.
(M. I./ Faxweb.al)
