Liderët më të lartë shtetërorë të Japonisë dhe Koresë së Jugut janë takuar për herë të parë pas më shumë se një viti ndërkohë që kjo periudhë ka qenë mjaft e tensionuar mes tyre dhe vendeve që përfaqësojnë.
Presidenti i Koresë Jugore, Moon Jae-in, dhe kryeministri i Japonisë, Shinzo Abe, u takuan në kuadër të një samiti trepalësh, të organizuar nga kryeministri kinez, Li Keqiang, në qytetin Chengdu. Tema kryesore e këtij samiti ishin bisedimet për çarmatosje mes Koresë Veriore dhe Shteteve të Bashkuara.
Ky takim shërbeu për liderët e Japonisë dhe Koresë së Jugut që t’i zbusin tensionet mes vendeve të tyre. Raportet mes këtyre shteteve u futën në krizë pasi Gjykata Supreme e Koresë së Jugut i urdhëroi kompanitë japoneze që t’i dëmshpërblejnë disa qytetarë të Koresë Jugore, të cilët ishin detyruar të punojnë për to gjatë pushtetit kolonial të viteve 1910-1945.
Japonia më pas vendosi pengesa për mallrat e importuara nga Koreja e Jugut në fushën e teknologjisë, duke i rënduar edhe më shumë marrëdhëniet mes dy aleateve të Shteteve të Bashkuara. Sidoqoftë, liderët e dy vendeve u pajtuan të martën që të takohen më shpesh, pavarësisht dallimeve për çështjet tregtare dhe historike, bëri të ditur zëdhënësja e presidentit të Koresë Jugore, Ko Min-jung.
Presidenti i Koresë se Jugut tha: “Japonia dhe Koreja e Jugut janë fqinjët më të afërt në aspektet historike dhe kulturore dhe partnere shumë të mëdha dhe të rëndësishme për këmbimet mes popujve të tyre”, shkruan “Reuters”.
