Tottenham e mori veten pas humbjes së pësuar kundër Chelsea-t me tri pikët e marra me përmbysje kundër Brighton në ditën e Shën Stefanit. E vetmja notë negative në shtëpinë e Tottenham është çështja Tanguy Ndombele.
Klubi londinez e ka blerë korrikun e kaluar për 62 milionë euro plus bonuse nga Lyon mesfushorin francez, i cili është bërë blerja më e shtrenjtë në historinë e klubit. Ndombele ka shënuar në debutimin e tij me Tottenham-in në Premier League (3-1 kundër Aston Villa-s), por nuk ka arritur të gjejë më hapësira në formacionin titullar pas fillimit të mirë.
Lojtari nuk është grumbulluar për ndeshjet kundër Wolverhampton, Burnley dhe West Ham, gjë që ka ndodhur edhe në ndeshjen e luajtur të enjten kundër Brighton-it. Duket se ish-ylli i Lyon është kthyer në një fantazmë në pak muaj.
Jose Mourinho ka folur në lidhje me situatën e tij pas ndeshjes së fituar kundër Brighton: “Nuk mund t’ju them se është i dëmtuar. Më ka thënë se nuk ishte në gjendje të luante. Frika nuk bazohet te probleme fizike aktuale, por tek ato që ka patur gjatë sezonit”.
Kërkesa e lojtarit tregon gjendjen e tij psikologjike. Që nga momenti që portugezi ka marrë drejtimin e Spurs, Ndombele nuk ka luajtur asnjë ndeshje nga minuta e parë: herën e fundit ka zbritur në fushë në Tottenham-Chelsea 0-2.
Discussion about this post