Të tjera detaje janë zbuluar nga ngjarja e rëndë e ndodhur në Lushnje mëngjesin e sotëm, ku kryetarit të bashkisë Fatos Tushe i vendosën lëndë plasëse në zyrë, që dyshohet se është granatë.
Sipas informacioneve të para policia dyshon se autori është Gëzim Saraçi, ish shofer i kryebashkiakut Fatos Tushe.
Fax News mëson se ish shoferi e ka pritur kryetarin te shkallët, ku më pas janë ngjitur së bashku. Bëhet e ditur se të dy kanë debatuar e më pas autori nga xhepi i xhupit ka nxjerrë lëndën plasëse.
Në këtë moment ka qenë e pranishme edhe sekretarja e tij Erisa Qalliu, e cila po ashtu është lënduar.
Nuk dihet se cili ka qenë mekanizmi i shpërthimit, por nga të dhënat paraprakë mësohet se shpërthimi ka ndodhur në zyrë.
Bëhet e ditur se Tushe dhe Qalliu ndodhen në spitalin e Lushnjës jashtë rrezikut për jetën.
Burime për Fax News bëjnë me dije se drejt vendngjarjes është nisur edhe drejtori i Përgjithshëm i Policisë së Shtetit Ardi Veliu dhe Tonin Voci, drejtori i policisë Kriminale.
Ende nuk është lokalizuar autori i sulmit, por policia ka ngritur postblloqe në të gjithë hyrjet dhe daljet e qytetit.
(M.Q/Faxweb.al)
