Lëvizja Vetëvendosje dhe Lidhja Demokratike e Kosovës duket të jenë shumë afër arritjes së një marrëveshjeje për formimin e një koalicioni për bashkëqeverisjen e vendit.
Përparimi në bisedimet disamuajshe mes partisë që i fitoi zgjedhjet e parakohshme parlamentare të 6 tetorit 2019, dhe asaj që doli e dyta ka ndodhur në takimin e pasdites së të mërkurës, ndërmjet kreut të VV-së, Albin Kurti, dhe udhëheqësit të LDK-së, Isa Mustafa.
Dy partitë janë deklaruar pas takimit të sotëm, që zgjati rreth tre orë, duke bërë të ditur publikisht se ka pasur “përafrim” mes tyre.
“Në kuadër të rifillimit të bisedimeve, në takimin e sotëm ndërmjet Lëvizjes VETËVENDOSJE! dhe Lidhjes Demokratike të Kosovës, pati përafrim”, ka thënë Vetëvendosje, nëpërmjet një komunikate.
Para VV-së, është prononcuar edhe LDK-ja. “Kemi lëvizje në përpjekje për marrëveshje. Do të kemi edhe një takim të radhës nesër”, ka thënë zëdhënësi i LDK-së, Besian Mustafa.
Gazeta Express ka mësuar nga burimet e saj brenda dy partive se një marrëveshje mes tyre është “shumë afër”.
Kjo marrëveshje, siç thonë burimet nga VV-ja dhe LDK-ja, mund të nënshkruhet nesër.
Bisedimet mes dy partive kishin ngecur prej javësh, teksa LDK këmbëngulte që ta merrte postin e presidentit, me të cilën nuk pajtohej VV-ja.
Mbetet të shihet se si janë zgjedhur mosmarrëveshjet mes dy partive./Express
Discussion about this post