Mbledhja e sotme e Këshillit Politik për Reformën Zgjedhore duket se është shoqëruar edhe me debate mes të pranishmëve.
Gazetarja e “FaxNews”, Eksiola Shehu raporton se gjatë mbledhjes Mesila Doda nga PDIU ka kërkuar që edhe kjo parti të përfaqësohet me ekspertë.
Kundër kërkesës së saj është poiziconuar deputeti i opozitës së re, Alban Zeneli. “Grupi i punës nuk mund të kthehet në agjensi punësimi, kaq ekspertë janë të mjaftueshëm”, mësohet të jetë shprehur ai.
Po ashtu, burimet thonë se Fatmir Mediu ka shprehur pakënaqësi në mbledhjen e Këshillit.
Në fund të diskutimeve, kërkesa e PDIU është rrëzuar, ndërsa është vendosur që të ketë 6 ekspertë: 1 nga PS, 1 nga PD, 1 nga LSI, 1 nga grupi demokrat që është Rudina Hajdari dhe dy Kuvendi (Viktor Gumi dhe Ilir Rusmajli).
Në mbledhje është diskutuar edhe për ndryshimin e sistemit, që do të jetë një pikë që do të merret në shqyrtim në vijim të punës. “Ne jemi dakordësuar që të diskutojmë edhe ndryshimin e sistemit, jemi të hapur për të diskutuar”, mësohet të ketë deklaruar Damian Gjiknuri.
Discussion about this post