Edhe pse ka bërë xhiron e mediave në dy ditët e fundit, Lefter Alla nuk ka ndërmend që të japë dorëheqjen, dhe aq më pak të kërkojë një ndjesë publike për pamjet që janë transmetuar.
Gjatë ditës së sotme ai deklaron se është nisur drejt Tiranës, ku pritet të ngrejë një padi në drejtim të ish-deputetit demokrat Ervin Salianji, pasi sipas tij ai është autor i montazhit të videos.
Nuk dihet se pse Alla ngre padi ndaj Salianjit në një kohë kur videoja është transmetuar për herë të parë nga gazetari Artan Hoxha.
Alla shprehet se kishte më shumë se një vit që ishte në dijeni të kësaj videoje, por shpresonte se shantazhet ndaj tij do të merrnin fund.
Postimi i plotë i plotë i Allës:
Dua të informoj opinion publik të Bulqizës dhe të gjithë Shqipërisë, me të drejtë të shokuar nga një video-montazh të publikuar në bashkëpunim nga Partia Demokratike dhe një televizion lokal, se sot jam nisur drejt Tiranës ku do të depozitoj një padi në ngarkim të shtetasit Ervin Salianji, një person me aktivitet përsëritës kriminal për situata të ngjashme, referuar organeve të drejtësisë shqiptare.
Dua të sqaroj gjithashtu se ekzistenca e një video-montazhi më është bërë me dije prej rreth një viti, por gjithmonë kam besuar dhe besoj se duhet të jetë drejtësia ajo që ta hetojë dhe ta zbardhë.
Prandaj deklaroj se unë do të pres zbardhjen e çdo vepre penale nga drejtësia.
Kushdo që më akuzon mua të presë veprimet e Prokurorisë dhe vendimin përkatës të Gjykatës.
(E.K/Faxweb.al)
Discussion about this post