18 zona të reja zhvillimi, Ahmetaj zbulon vendimet e qeverisë: S’ka më ndërtime shkel e shko, nga kush do monitorohen punimet

Ministri i Shtetit për Rindërtimin Arben Ahmetaj në një konferencë të jashtëzakonshme nga kryeministria ka publikuar të gjitha zonat ku do të ndërtohet, pas tërmetit të 26 nëntorit, që la të pastrehë mijëra persona.

Ahmetaj tha se vetëm në Tiranë do të ngrihen 9 zona të reja zhvillimi të vendosura nga Uzina e Autotraktorëve në Ndroq dhe në Vaqarr.

Ku do të vendosen njësitë e reja të ndërtimit:

Njësia e parë e ndërtimit do të jetë në Shijak dhe do të monitorohet nga Fondi Shqiptar i Zhvillimit

Njësia e dytë në Kurbin, në Bashkinë e Laçit, dhe procesi do të ndiqet nga enti i banesave të Turqisë

Njësia e tretë e ndërtimit do të jetë në Thumanë

Në Bashkinë Kurbin kemi një tjetër njësi ndërtimit, përveç asaj të Bashkisë së Laçit

Në Krujë kemi shpalljen e dy zonave të ndërtimit, në Bubq, që është një nga zonat më të prekuta, dhe me shtrirje të madhe dhe në bashkinë e Krujës .

Në Durrës  kemi shpalljen e një zone ndërtimit, që po ashtu do të monitorohet nga Fondi Shqiptar i Zhvillimit

Në Vorë do të vendoset një zonë zhvillimi

Në Kavajë një zonë zhvillimi

Në Tiranë do të kemi 9 zona të reja zhvillim, e para do të jetë 5 Maji, zona e Uzinës së Autotratorëve, zona e Kombinatit, Universiteti Bujqësor i Tiranës, në Baldushk, zonën e re në njësinë e Ndroqit, zonë të re në Vaqarr, dhe në Njësinë administrative Zallherr, po pjesë e Bashkisë së Tiranës.

Ahmetaj tha më tej se ndërtimet e reja do të jenë të standardit maksimal, që përfshijnë edhe masat antisizmike. Ndërkohë ministri iu bëri thirrje njësive vendore, që të kenë sa më parë aplikimet e plota të banorëve që u janë dëmtuar banesat nga tërmeti.

“Këto dy muaj qeveria në bashkëpunim me pushtetin vendor i ka shfrytëzuar për të studiuar nga A-ja, deri te shpallja e ndërtimit në këto zona. Nuk bëhet më fjalë për të ndërtuar shkel e shko. 

Bëhet fjalë për një process të plotë dhe gjithëpërfshirës, që përfshin dhe hartimin e masterplaneve, si dhe masat antisizmike në këto banesa, që të mos kemi përsëritjen e fatkeqësive të tilla. 

Enti i Banesave ka hapur garën dhe për planin e banesave private, në datën 6 Shkurt do të kemi modelet për të cilat do të ndiqen në zbatim në të gjitha njësitë vendore”, deklaroi Ahmetaj në fjalën e tij.

(E.K/Faxweb.al)