Ish-Prokurori i Përgjitshëm Arben Rakipi në një intervistë për emisionin “Ajsberg” në Fax News foli në lidhje me mbarvajtjen e Reformës në Drejtësi. Sipas Rakipit çështja që lidhet me vettingun, ka problematika jo të vogla, ndërkohë që në tërësi theksoi se Reforma po ecën ngadalë.
“Dua të sqaroj se elementi i Reformës në Drejtësi ka përmbledhur një numër çështjesh. Procedurat gjyqësore dhe lidhjet organike janë në efektivitet tashme, megjithëse të zvarritura tashmë funksionojnë. Me ngadalësi, por po lëvizin.
Ndërsa çështja që lidhet me vettingun, janë çështje që kanë problematika jo të vogla, të pathemelta dhe të pakuptueshme. Në vlerësimin e këtij procesi është fakti që ky ligj ka qenë shumë i ri dhe si çdo ligj i ri ka problemet e veta në zbatim dhe krijon kaos.
Fryma e ligjit ishte të gjente ilaçin, për tu përmirësuar, që gjyqësori të mos shfaqë më këtë lloj defektesh që ka pasur në të shkuarën.
Unë kam ngritur zërin që nuk është thjeshtë një proces juridik, që do të hetohet thjeshtë për pasuritë, por është cilësuar si një proces shërues si ilaç. Duhet të ishte një proces që të kontrollohej nga njerëz të interesuar për mbarvajtjen e këtij procesi.”- tha Rakipi.
