Në një çadër familja prej tetë anëtarësh kryen të gjitha aktivitetet dhe nevojat ditore, ndërsa aty duhet të gatuajnë, ushqehen, flejnë, studiojnë fëmijët dhe e vetmja kërkesë që kanë për momentin është një kontenier për të përballuar disa ditë për aq kohë sa edhe kushtet klimatike janë të ftohta.
Alfred Gjoka nga fshati Xhuxhë në Mirditë, është babai i 6 fëmijëve dhe bashkë me bashkëshorten, jetojnë me besimin se me ndihmën e Zotit dhe shpresën për një reagim nga autoritetet do arrijnë të dalin nga vështirësitë ekstreme.
“Të gjitha, këtu i bëjmë, fëmijë studiojnë, lahen ushqehen, me vështirësi, po s’kemi ç’bëjmë. I laj fëmijët në të nxehtin e ditës, pastaj futen nën batanije. Thirrje për qeverinë apo shoqatat me dorë në zemër, të na sjellin së paku një kontenier. Ka qenë kohë e mirë se të binte borë, do na vdiste i ftohti”, tha kryefamiljarja.
“Pa punë, kam 6 fëmijë. Komisioni i vlerësimit ka qenë 2 herë, ka dalë e pabanueshme shtëpia. Shpresë si për gjithë të tjerët, se di ç’të them. Disa letra i kemi bërë, nuk e di, më kanë sjellë këtë çadrën që shikoni. Shiu që ra hyri i gjithi brenda, nëse do të mbante dimër si zakonisht do ishte e pamundur t’ia dilnim. Do donim një kontenier të paktën, sa të dilnim gjallë në Pranverë. Zoti e bën mirë, pastaj shteti ishalla po interesohet”, tha kryefamiljari Alfred Gjoka për gazetarin e Fax News, Prenga Gjikolaj.
“Jam në klasë të pestë, e kemi shkollën shumë larg, shkojmë me furgon. I ftohti ka ndikuar që të biem pak në mësime. Me shumë vështirësi arrijmë të përballojmë kushtet, i bëjmë detyrat me shpejtësi që të futemi në batanije dhe të qëndrojmë ngrohtë. Kemi frikë natën kur fryn erë. Apeli im është që të na ndihmojnë, të paktën një kontenier që të kalonim dimrin, pastaj një shtëpi që të jetoj me familjen time. Dua të bëhem doktoreshë, që të ndihmoj njerëzit”, tha njëra nga vajzat e çiftit.
(F.GJ/FAXWEB.AL)
Discussion about this post