Zëdhënësi iu presidnetit Tedi Blushi i është përgjigjur ministrit të Brendshëm Sandër Lleshajt, i cili tha se Republika Parlamentare nuk diskutohet, por respektohet.
“Asnjë sekondë për të humbur me “Gjeneralin” nën poture. Si mund të bëjë moral për Kushtetutën një gënjeshtar që donte të hynte në shkelje të Kushtetutës me kamuflazh në zyrën e ministrit?
Qetësohu “Gjenerali” nën poture: Rendin në 2 mars e garanton Presidenti bashkë me popullin!”– shkruan Blushi.
Pak më parë Ministri i Brendshëm Sandër Lleshaj shkruante “Koha për të kornizuar me ligj funksionimin e institucionit të Presidentit! Prej 20 vjetësh diskutohet dhe harrohet. Por siç po duket deri në dhimbje tanimë, ideja se kreu i shtetit është individ i vetërregullueshëm, ka vdekur! Republika Parlamentare nuk diskutohet, respektohet.
Fakti që Policia e Shtetit duhet të hyjë në historinë e planetit si e para polici në botë që garanton tubimin antiqeveritar të kreut të shtetit, flet më shumë se një miliardë fjalë për çrregullimin e skajshëm të zotërisë që e ka kthyer Presidentin në një absurditet folklorik.“- shkruan Lleshaj.
Presidenti Ilir Meta ditën e sotme ka lajmëruar një tubim më datë 2 Mars në Bulevardin “”Dëshmorët e Kombit”.
Meta ka deklaruar gjatë një konference me gazetarët se në këtë datë ai do të firmos në bulevard një dekret me anë të të cilit do të shpartallojë grushtin e shtetit.
Ai ka bërë thirrje për pjesmarrje popullore për të çliruar sipas tij institucionet përreth Bulevardit nga uzurpimi ku edhe do të firmoste një dekret për të cilin nuk ka treguar detaje se me çfarë ka të bëjë.
(M.Q/Faxweb.al)
Discussion about this post