Farsa me Reformën/ Besnik Cani ka zgjedhur anëtarët e SPAK, vetë shkarkohet nga Vetingu për pasurinë

Komisioni i Posaçëm i Apelimit ka shkarkuar nga detyra anëtarin e KLP, Besnik Cani, duke e lënë kupolën e prokurorisë me 10 anëtarë.

Cani është anëtari i tretë i KLP-së që shkarkohet nga Vetingu, ndërkohë që edhe njëherë vendoset në pikëpyetje sesi funksionon Reforma në Drejtësi.

Cani dhe anëtarë të tjerë, që janë rrëzuar në Veting, kanë zgjedhur anëtarët e SPAK, apo kandidatët për BKH, si dhe prokurorin e përgjithshëm, ç’ka vë në pikëpyetje dhe legjitimitetin e këtyre të fundit.

Fillimisht Prokurori, Besnik Cani u konfirmua në detyrë më 27 nëntor 2018 nga trupa gjykuese e udhëhequr nga Olsi Komici, me relator Lulzim Hamitaj dhe anëtare Brunilda Bekteshi.

Dy javë më pas, Cani u zgjodh anëtar i Këshillit të Lartë të Prokurorisë megjithëse kishte probleme me pasurinë.  Por vendimi i KPK për Besnik Canin u ankimua nga Operacioni Ndërkombëtar i Monitorimit (ONM) dhe pas tyre edhe nga Komisioneri Publik të cilët kritikuan vendimin  e konfirmimit në detyrë të tij, pavarësisht problemeve të shumta me pasurinë, aftësitë profesionale dhe shkeljen e etikës.

Sipas Komisionerit Publik, vendimi i Komisionit të Pavarur të Kualifikimit ishte “kontradiktor dhe jo-bindës” dhe se ishte marrë në interpretim të gabuar të ligjit.

(E.K/Faxweb.al)