Naftëtarët e Ballshit u janë rikthyer ditën e sotme protestave, për shkak se ende nuk ka nisur puna në Rafineri, dhe ata kërkojnë që të jepet njëherë e mirë zgjidhje për situatën e tyre.
Naftëtarët shprehen se në rast se nuk nis puna, do të ishte mirë që të zgjidheshin kontratat e tyre, dhe të mund të përfitonin nga statusi i naftëtarëve që ka kaluar me 140 vota në Kuvend.
Statusi parashikon që naftëtarët të paguhen me tre vite asistencë nga ana e shtetit, sa kohë që ka ndërprerje të njëanshme të kontratës nga ana e kompanisë.
“Ne si çdo ditë do të jemi në protestë përpara Rafinerisë, që ti japin njëherë e mirë fund kësaj situate, ne kërkojmë që të furnizohemi me lëndë të parë në mënyrë që të rifillojë puna. Ne jemi përpara portës së Rafinerisë që palët të ndërmarrin një takim me Bankers, në mënyrë që rezultati të jetë për të rifilluar punën në rafineri.
Minimumi që ne kërkuam ishte dhënia e tre pagave që e morëm, por tani duam të rikthehet puna, pasi kemi lidhur jetën me këtë rafineri.
Iu bëjmë thirrje të gjitha instancave shtetërore, i bëjmë thirrje zotit Rama që ti japë zgjidhje kësaj situate. Le ta mbyllin rafinerinë, nëse këtu nuk ecën puna, të na japin librezat, pagat e prapambetura, dhe nga statusi ne dalim në asistencë, siç e parashikon statusi i naftatarit, dhe përfitojmë një asistencë deri në 3 vjet të 80% të pagës minimale“, shprehet një prej përfaqësuesve të naftëtarëve.
Pak ditë më parë naftëtarët u futën për rreth 2 javë në grevë urie, dhe e vetmja arritje që morën në fundin e saj ishte ajo e marrjes së tre pagave të prapambetura.
(E.K/Faxweb.al)
Discussion about this post