“Mbështetja e Grenell ishte thelbësore në rrëzimin e Kurtit”, analisti: Ishte puç konspirativ, pse u zgjodh ky moment

Analitsti Enver Bytyqi i ftuar në emisionin “Pasdite me Xhaxhiun” në Fax News foli në lidhje me rrëzimin e qeverisë së Albin Kurtit mbrëmjen e kaluar gjatë seancës së jashtëzakonshme të zhvilluar në Kuvendin e Kosovës.

Bytyqi tha se kjo ishte një humbje shumë e madhe për Kosovën, ndërkohë që ajo që ndodhi në Kuvend ndaj qeverisë së Kurtit, sipas tij ishte një puç legjitim, por edhe një puç konspirativ.

Sipas Bytyqit ky moment u zgjodh pasi do ti hapet rrugë nënshkrimit të marrëveshjes me Serbinë, që sipas tij padyshim parashikon ndarjen e Kosovës.

“Kam parandjerë që kjo qeveri e Kurtit nuk do ta ketë mandatimin e plotë, për shkak se kontradiktat midis kësaj aleance kanë qenë të dukshme. Është një përplasje mes kastës së vjetër dhe kastës së re. Ajo që ndodhi dje kishte të bëne me një puç legal, i legjitimuar, por edhe një puç konspirativ në kuptimin e zhvillimeve që ndodhin në Kosovë.

Ky moment u zgjodh sepse duhet ti hapet rrugë nënshkrimit të marrëveshjes me Serbinë. Nënshkrimi i marrëveshjes me Serbinë do të bëhet menjëherë sapo të vijë kryeministri i ri.

Nënshkrimi i marrëveshjes me Serbinë do të bëhet menjëherë sapo z. Thaçi ta marrë kryeministrin e ri për dore dhe ta formosë marrëveshjen. Në kushte të Emergjencës dhe Pandemisë Botërore, presidenti në Kosovë sipas kushtetutës merr kompetencat e kryeministrit. Në këto kushte askush nuk do të guxojë të reagojë sa i përket marrëveshjes Kosovë-Serbi dhe marrëveshja parashikon ndarjen e Kosovës pa diskutim. Është marrëveshja me e keqe e mundshme dhe për këtë presidenti i Kosovës ka rënë dakord.

Mbështetja e z. Grenel ishte thelbësore në rrëzimin e z. Kurtit. Por thelbësore ishte parapërgatitja e z. Thaçit për të përgatitur disa aleanca. 

Tirana Zyrtare nuk hesht, po flet me heshtjen, ajo është kumbara i afrimit të presidentit të Kosovës me presidentin e Serbisë është kryeministri i Shqipërisë.

Ajo që ndodhi dje në Kosovë nuk është një goditje për Albin Kurtin, ai ka gabimet e tij në këto 50 ditë, pavarësisht se dha shpresë, për mua goditja ishte për Kosovën. E vetmja viktimë në këtë mes është Kosova dhe fituese është Serbia.”- tha Bytyqi.

(M.Q/FAXWEB.AL)