Mjeku Roland Xhaxho, ishte një nga dhjetëra mjekët e infektuar me COVID-19 në vendin tonë, ndërkohë që pak ditë më parë la edhe spitalin e Infektivit pasi mposhti plotësisht koronavirusin.
Gjatë një interviste “skype” në Fax News, reanimator foli edhe për gjendjen e tij shëndetësore, ku tha se po shkon drejt përmirësimit.
“Gjendja ime po shkon drejt përmirësimit në mënyrë graduale, duke e rimarrë veten nga ana fizike gjithmonë e më mirë.Duke qenë mjek reanimator dhe duke i njohur komplikimet, për mua ishte e papritur, por ndodhi. Ditët e para, tek unë u shfaq me temperaturë, më pas me humbjen e oreksit. Kam humbur rreth 12 kg. Ditët e para nuk kisha një rënie të peshës, por proceset që kishte mbi organizmin tim virusi bëri që të humbisja peshë, pavarsisht se oreksi m’u rikthye. Besoj javën tjetër do të rikthehem në punë.”- tha Xhaxho.
Xhaxho theksoi se sistemi shëndetësor është i përgatitur edhe nëse do të ketë një valë tjetër të virusit, ndërkohë që këshilloi të rinjtë që të rrinë larg prindërve të tyre në mënyrë që mos të kontaminohen më këtë sëmundje.
Po ashtu Xhaxho shtoi se ky është një virus i pabesë, pasi nuk dihet se çfarë dëmtimesh mund të japë në organizëm.
“Kemi kapacitete të pranojmë dhe 300 pacientë njëkohësisht. Sistemi shëndetësor është mirë organizuar dhe i përgatitur qoftë dhe për një sulm të dytë, nëse do të ketë nga ky virus. Të rinjtë duhet të shkojnë të punojnë, por prindërit e tyre duhet ti mbajnë pak larg në distancë sociale në mënyrë që të shmangin kontaminimin e tyre.
Është virus i pabesë sepsë nuk e di se çfarë dëmtimesh mund të japë. Ky është një virus që shkatërron organizmin edhe kur nuk ke tepmperaturë, është shumë aktiv dhe duhet patur shumë kujdes dhe duhet respektuar rregullat. Në mënyrë që të shmangim numrin e pacientëve që mund të rrezikojnë jetën. “- tha Xhaxho.
Discussion about this post