Aktori Neritan Liçaj me shenja të shumta dhune në trupin e tij, është i pamundur që të komunikojë sot me median, pasi përpara syve iu shemb godina e Teatrit Kombëtar, për të cilën kishte më shumë se 2 vite që qendronte dhe protestonte.
Liçaj tha se ai nuk është në gjendje të fliste, për shkak se i kishte ikur edhe zëri, ndërkohë që rikthimi i tij te protesta, u prit me duartrokitje nga ana e të pranishmëve të tjerë, ku nuk munguan as lotët.
Kujtojmë se policia e shtetit, me më shumë se 1 mijë trupa në teren, mësynë sot në ambientet eTeatrit Kombëtar, dhe shoqëruan me dhunë aktivistë dhe artistë që qendronin në mbrojtje të godinës, tashmë prej më shumë se dy vitesh.
Një prej personave të parë që u shoqërua ishte pikërisht Liçaj, ndërkohë që u shfaq i përlotur dhe me pranga në ato momente. Lirimi i tij u krye vetëm një orë më parë, në një kohë kur fadromat e IMT-së e kishin rrafshuar godinën e Teatrit Kombëtar dhe atij Eksperimental.
Qindra qytetarë qendruan me orë të tëra në korpusin e Teatrove, por e patën të pamundur që të çanin kordonin policor, që shkoi aty dhe i armatosur. Shumë prej efektivëve nuk mbanin as numrat e identifikimit, çka shton dyshimet lidhur me vlefshmërinë e këtij aksioni të ndërmarrë.
(E.K/Faxweb.al)
