Kryetari i Partisë Demokratike, Lulzim Basha është takuar ditën e sotme me tregtarë në tregun agro-ushqimor në Rrogozhinë, ndërkohë që ka dëgjuar edhe shqetësimet e tyre të cilët janë shprehur të revoltuar, pas nuk kanë marrë asnjë ndihmë.
“Po i rris fëmijët rrugëve. Jam e sëmurë, nuk kam marrë asnjë ndihmë”, iu drejtua një tregtare Bashës, e cila po shiste aty pranë.
Me anë të një video-selfie, Basha tha se gjendja e fermerëve është po aq e keqe se sa gjendja e bizneseve në të gjithë vendin.
“Jam në tregun e Rrogozhinës në këtë lidhje të drejtpërdrejtë. Gjendja e fermerëve është po aq e keqe sa gjendja e bizneseve. Konsumi ka rënë në zero. Rrinë këtu me orë të tëra. Askush nuk ka marrë ndihmë. Ky është realiteti, përpara kam kilometra me tezga, gjysmën e tyre do e groposin produktin sepse nuk u shiten.
Ndaj bredhjet dhe propaganda e qeverisë nuk mund të fshehë dështimin. E keqja po vazhdon të thellohet. Vetëm te Teatri Kombëtar duan të harxhojnë 30 milion euro. E kanë mendjen vetëm të zhvasin dhe të grabisin.
Kjo është një Shqipëri e robëruar. Shpëtimi i vetëm është që ju me votën tuaj ti drejtohemi kutive dhe t’i japim fund kësaj të keqje. Kjo situatë duhet të marrë fund.
Gjithë Shqipëria punon për 5 oligarkë. Ky është realiteti nga tregu i Rgozhinës, kjo është Shqipëria reale”, deklaroi Basha përmes një video selfie.
Discussion about this post