Sot do të mblidhet Këshilli Politik për Reformën Zgjedhore që pritet të mbahet në Pallatin e Kongreseve. Takimet e Këshillit Politik po bëhen më të shpejta me qëllim që të bien dakord për përfundimin e Reformës Zgjedhore deri më datën 31 maj.
Pikat e nxehta që pritet të diskutohen janë roli i policisë gjyqësore gjatë zgjedhjeve, kërkesa e opozitës për qeveri tranzitore që është shprehur shpesh herë si kusht nga ana e opozitës si dhe vettingu për gjyqtarët të kolegjit zgjedhor dhe depolitizimit të administratës, konfirmoi gazetarja e Fax News Jonada Zelka.
Sa i përket sistemit zgjedhor, duhet thënë që ka një dakordësi mes mazhorancës dhe opozitës. Ka pasur një angazhim të ambasadores Yuri Kim e cila ka propozuar një ndryshim të sistemit duke bërë një propozim konkret për një sistem danez.
Deklaratat e opozitës dhe mazhorancës ishin të njëjta në këtë pikë ku të dyja deklaruan që koha nuk mjafton që deri më 31 maj, datë për të cilën janë zotuar, të bëhet dhe ndryshimi i sistemit.
Para mbledhjes së Këshillit Politik, ambasadorja Kim është takuar me përfaqësuesin e PS-së Damian Gjiknuri, përfaqësuesen e opozitës parlamentare Rudina Hajdari, përfaqësuesin e PD-së, Oerd Bylykbashin dhe atë të LSI-së, Petrit Vasilin.
Mësohet se Kim kishte në axhendë një takim të përbashkët dhe më pas me secilin prej tyre do të ‘kokë më kokë’. Kohët e fundit, Yuri Kim është shfaqur tepër aktive për këtë proces por edhe për atë të reformës në drejtësi duke mbajtur edhe takime me të gjithë faktorët politikë. Ajo ka theksuar se ShBA qëndron afër Shqipërisë.(A.M/Faxweb.al)
Discussion about this post