Një ekip i CNN u arrestua ndërsa po bënte një raportim live televiziv mëngjesin e kësaj të premte në Minneapolis – dhe më pas u la i lirë rreth një orë më vonë – pasi ekuipazhi mbuloi protestat e vazhdueshme për vdekjen e George Floyd, i cili ishte një njeri me ngjyrë.
Policia e Shtetit arrestoi korrespodentin e CNN Omar Jimenez, producentin dhe kameramanin e tij menjëherë pas orës 5 të mëngjesit, ndërsa Jimenez po raportonte drejtpërdrejt nga një rrugë në jug të qytetit, afër vendit ku ishte vendosur një postobllok policie.
Guvernatori nga Minesota, Tim Walz i kërkoi falje presidentit të CNN Jeff Zucker dhe tha se ekipi do të lirohej menjëherë.
Vdekja e George Floyd, 47-vjeçarit afrikano-amerikan që humbi jetën gjatë një arrestimi policor në Minneapolis, Minesota, ka sjellë protesta të dhunshme në Amerikë, aq sa presidenti Donald Trump po mendon që të hyjë me ushtri për të neutralizuar turmat.
Demonstruesit kanë shpërthyer një seli policie në Minneapolis, duke vendosur zjarr dhe duke shkatërruar gjithçka që iu del përpara. Nëse në fillim ka pasur një prani të madhe të punonjësve të policisë, me kalimin e orëve ata janë tërhequr, duke mos bërë rezistencë ndaj prishjes, dhe për të shmangur përplasje që mund të çojnë në humbje jete.
Një korrespodente e RT e cila ka qenë në vendin e ngjarjes shprehet se në shumë ndërtesa janë aktivizuar alarmet e zjarrit, ndërkohë që protestuesit vijojnë që të qendrojnë në rrugë, dhe jashtë godinave të institucioneve.
Katër oficerët e policisë që janë përfshirë në vrasjen e George Floyd të hënën raportohet se kanë punuar në zonën e 3-të, ku protestat u përshkallëzuan së pari në fillim të kësaj jave, duke zbritur në trazira të mërkurën në mbrëmje.
Plaçkitja, zjarrvënia dhe vandalizmi janë përhapur në të gjithë qytetet e Minesotës, ndërkohë që policia ka humbur kontrollin e situatës. Presidenti amerikan Donald Trump ka premtuar veprime vendimtare për të shuar trazirat në Minneapolis, duke kërcënuar se do të përfshijë ushtrinë nëse kryetari i qytetit nuk do ta bëjë punën “si duhet”.
Ultimatumi erdhi herët në mëngjes të premten në një postim të presidentit në Tëitter, duke e quajtur kryetarin e Minneapolis Jacob Frey si “shumë të dobët” dhe “kryetarin e majtë radikal”, ndërsa paralajmëroi se qeveria federale do të marrë përsipër situatën nëse autoritetet lokale nuk e vendosin atë nën kontroll.
“Nuk mund të qëndroj prapa dhe të shikoj që kjo të ndodhë në një qytet të madh amerikan, Minneapolis. Një mungesë e plotë e udhëheqjes”, tha Trump në postimin e tij. “Ose kryetari shumë i dobët i të majtës Radikale, Jacob Frey, të marrë nën kontroll qytetin, ose unë do të dërgoj Ushtrinë Kombëtare dhe do ta bëj punën e duhur”, tha më tej Trump.
Kryetari i Komunës së Minneapolis, demokrati Jacob Frey, menjëherë dënoi incidentin duke kërkuar që agjentët e përfshirë të akuzohen dhe të gjykohen. “Në 36 orët e fundit, i bëra vetes një pyetje: pse nuk është njeriu që vrau Xhorxh Floidin në burg tani? Unë nuk kam parë ndonjë kërcënim apo veprim që kërkon sjellje të policisë ”.
Trazirat shënojnë ditën e tretë të tyre pas arrestimit brutal të George Floyd nga policia e rajonit të 3-të. Vdekja e njeriut me ngjyrë, ka shkaktuar tensione dhe pakënaqësi në të gjithë vendin, duke rikthyer edhe njëherë debatet mbi racizmin në SHBA.
