Deputeti Ralf Gjoni i është përgjigjur ish-drejtoreshës së tatimeve Brisida Shehaj, e cila thoshte se me lista të hapura apo të mbyllura Gjoni merrte vetëm votën e tij në garë. Gjoni e quan Shehajn një të ricikluar në LSI, që sipas tij është mësuar me lekë të madh e të pistë në institucionet që ka drejtuar.
Postimi i plotë i Gjonit: Dje i kam bërë thirrje LSI të dëgjonte zërin e themeluesit të saj për listat e hapura. Sot, papritur sulmohem nga rekrutimi më i ri i LSI, ish drejtoresha socialiste e tatimeve dhe ish drejtore e task forcës për tokat e vjedhura të bregdetit.
Normal që në botën e kësaj, atje ku rrjedh e rrëshqet pafund leku i pisët, unë nuk marr asnjë votë, sepse unë nuk kam vjedhur kurrë fonde publike dhe as kam hedhur ndonjëherë lekë për të blerë vota. Prandaj ajo mendon se unë nuk votohem. Sepse për të dhe kasapët që e kontrollojnë, vota është e lidhur vetëm me lekun dhe pazaret, jo me qytetarët dhe parimet.
Në botën e tyre kur je idealist, konsiderohesh idiot e kur je matrapaz dhe hajdut, je njeri i zoti. Kur i pyet se si kanë fytyrë të dalin në publik mbas vjedhjeve spektakolare që kanë bërë, të përgjigjen “E ku qëndron problemi këtu?”. Problemi o rob i ricikluar qëndron se na keni lodhur. Të gjithë ju që shiteni e bliheni si në tregun e gjësë së gjallë e më pas i trajtoni edhe njerëzit si të ishin bagëti. Lodhja do të kthehet në revoltë dhe revolta do hapë dyert e ftohta për ju. Dita e gjykimit po vjen. Ju do humbisni, populli do fitojë! (E.K/Faxweb.al)
Discussion about this post